Зошто сме гневни и раздразливи кога сме гладни?

Според науката, навистина можеме да бидеме гневни и раздразливи кога сме гладни, а причината за тоа е ниското ниво на шеќер во крвта кое предизвикува цела низа реакции кои, на крај, влијаат и врз нашето расположение.

Колку пати ви се случило да бидете гневни и нервозни без навидум никаква причина за откако ќе се најадете, да сфатите дека само сте биле гладни?

Оваа појава е толку честа, што во англискиот јазик има и посебен збор за неа - hangry е кованица од зборовите hungry (гладен) и angry (гневен).

Па, зошто сме гневни кога сме гладни?

Зошто чувствуваме глад?

Ако сте личност која ја сака храната, веројатно не ви треба потсетник за да јадете. Но, нашето тело сепак го има тоа – чувството на глад.

По јадење, во нашиот желудник почнува дигестијата на храната и овој процес трае околу 130 минути.

Во последната фаза почнува да се лачи хормон кој создава контракции во желудникот. Откако желудникот ќе се испразни, во него почнува да се лачи и хормонот грелин.

Овој хормон активира одредени неврони кои му даваат знак на мозокот дека е време за јадење, па почнуваме да чувствуваме глад.

Која е поврзаноста помеѓу чувството на глад и раздразливоста?

Истражувањата покажуваат дека чувството на глад навистина е поврзано со чувства како гнев и раздразливост.

Истовремено, овие негативни чувства биле забележани кај голем дел од испитаниците, без разлика на нивната возраст или нивниот пол.

Според експертите, постои точна причина зошто се јавуваат чувствата како гнев.

Најпрво, кога не јадеме подолг период, се намалува нивото на шеќер во крвта (гликоза).

Намаленото ниво, пак, поттикнува лачење хормони, вклучувајќи адреналин и кортизол. Овие хормони се ослободуваат во крвотокот за да го регулираат нивото на шеќер.

А, веќе добро познато е дека кортизолот и адреналинот се хормони кои можат да предизвикаат емоции како гнев и раздразливост.

Истовремено, ниското ниво на шеќер во крвта може да има влијание и врз работата на самиот мозок.

Односно, кога нивото на шеќер е ниско, може да се јави нарушување на некои функции на мозокот, како оние што ни помагаат да го контролираме импулсивното однесување.

Па, поради ова, некои луѓе не само што се чувствуваат раздразливо, туку и се однесуваат гневно кога се многу гладни.

Ако станува збор за личност која веќе има проблеми со темпераментот, чувството на глад може да ги влоши симптомите.

Спирова С. | Црнобело