8 причини зошто да посвоите куче од стационар

Размислувате за вдомување миленик? Пред да го поставите прашањето „колку чини ова кутре,“ ви советуваме да ги разгледате локалните стационари.

Постојат најмалку 8 причини зошто да посвоите куче кое моментално престојува во стационар...

1. Ќе спасите живот

Секоја година милион животи згаснуваат преку еутаназија само заради тоа што сопствениците се откажуваат од своите миленици. Зошто вие да не бидете херојот на овие животни кои очајно посакуваат посреќно секојдневие?

2. Ќе заштедите пари

„Купувањето“ миленик не само што не претставува задоволство, туку и е скапо. Кога посвојувате куче трошоците се минимални, плус сте фокусирани за квалитетот на неговиот живот, а не на тоа колку чини истиот.

3 .Ќе ве направи да се чувствувате подобро

Чувањето милениче има свои психички, ментални и емотивни придобивки, но кога имате вдомен миленик сите тие предности двојно се зголемуваат. Имате чувство дека сте оствариле нешто добро, нешто големо, нешто што никој не може да ви го одземе.

4. Директно се борите против насилството врз животните

Стационарите не се најбезбедно место за милениците, па понекогаш дури и се опасни по нивниот живот од повеќе причини. Со посвојување, директно се борите да ја подобрите состојбата на нивниот живот.

5. Можете да посвоите возрасно куче

Веќе израснатите кутриња имаат усвоени навики, па доколку немате простор и време за дресирање и борење со хаосот кој го прават на почетокот, вдомувањето неколку годишен миленик е идеалното решение.

6. Постои огромен избор

Колку и да звучи грубо, во стационарите се сместени голем број на кучиња со различна раса, големина и навики. Можете да го одберете токму она кое совршено ќе се вклопи во вашето секојдневие.

7. Ги поттикнувате и другите да посвојат

Кога блискиот круг на луѓе ќе видат дека вашето милениче од стационарот е повеќе од воспитано, чисто и мило, нема да му одолеат. Со тоа ја промовирате најважната порака - вдомете ги напуштените животни!

8. Ќе добиете бесконечно благодарен пријател

Сигурно веќе знаевте, но бидете убедени дека нема подобро чувство од благодарноста која секојдневно ќе ја гледате во неговите очи.