За што треба да размислите пред да почнете да чувате куче?

Кучињата се најдобрите пријатели на човекот и супер друштво, па затоа не е ни чудно што многу луѓе се одлучуваат за куче како домашно милениче.

Но, пред да чувате куче, важно е да размислите на следниве неколку работи:

Дали сакате младо или постаро куче?

Без разлика дали ќе купувате или ќе вдомите куче, важно е да знаете дека има разлика во чувањето на кученце кое е штотуку родено и постаро кученце. Младите кутриња ќе треба да ги научите на сите хигиенски навики и да ги дресирате од почеток, а на постарите кучиња ќе им треба време да се прилагодат на новата средина, па треба да бидете потрпеливи.

Дали ќе можете финансиски да ги поднесете трошоците?

Како за секое милениче, така и за кучињата се потребни финансиски средства. Вакцини, ампули, прегледи на ветеринар, стерилизација, храна се само дел од трошоците кои ќе настанат. Размислете и видете дали имате можности за тоа, па потоа уште еднаш преиспитајте ја одлуката.

Кој ќе го шета кучето?

За многу луѓе шетањето на кучето е обврска која тешко можат да ја вметнат во дневниот распоред. Ако имате слободно време за тоа- супер, но ако сте зафатени, размислете или договорете се да ја делите оваа обврска со некој близок.

Дали сте често надвор од дома?

За разлика од мачките, кучињата не можат да седат долго сами. Ако сте често отсутни од дома, размислете дали треба да земете куче бидејќи може да му направите полошо. Ако патувате ретко, најдобро е да се договорите со некој да ви го причува миленичето на некое време.

Каде живеете?

Ако живеете во изнајмен стан, проверете со сопственикот дали е дозволено да чувате куче. Исто така, размислете дали ќе останувате подолго време во тој стан или ќе го напуштите, бидејќи така ќе треба од после да мислите каде ќе го сместите кученцето, што може да доведе до проблеми. Малите станови не се погодни за големи кучиња, па тоа е уште нешто што треба да го имате на ум.

Дали навистина сакате да чувате куче?

Желбата што ја имате во главата е многу различна од реалноста. Бидете искрени кон себе и одлучете дали сакате куче само зошто мислите дека е интересно, или навистина сте подготвени да се грижите за него, со сите предности и маани што ги носи живеењето со ова домашно милениче.

М. В. | Црнобело