Како да се грижите за вашиот миленик, а истовремено да ги почитувате препораките заради пандемијата?

Во овој период, оние кои имаат миленици се исто така загрижени за нив, не сакаат да ги запостават и сакаат да им понудат соодветно внимание.

Според СЗО, вирусот се има појавено кај минимален број случаи на миленици, но велат дека истите не можат да го пренесат на луѓе.

Сепак, и нив им е потреба посебна грижа и внимание овој период, а во продолжение погледнете на што треба да се посветите:

Немојте да го напуштате миленикот

Поради стравот од вирусот, голем број миленици беа напуштени. Можеби и вие сте помислиле да го напуштите вашето милениче, но не правете го ова.

Милениците нема да ви го пренесат вирусот, а дефинитивно не се потребни уште кучиња скитници и улични мачки.

Набавете храна за две недели

Бидејќи е препорачливо да излегувате што е можно поретко, добро би било да набавите храна и за вашиот миленик што ќе ви трае две недели.

Се разбира, немојте да купувате повеќе отколку што ви треба, бидејќи има и други луѓе кои во периодов треба да купат храна, a не секој одеднаш може да си дозволи голема количина, па не дозволувајте да снема.

Притоа, доколку има потреба, набавете и средства за заштита од паразити, песок (доколку чувате мачка) и лекови (доколку миленичето прима терапија).

Најважно е да бидете опремени со сè што му е потребно на миленичето, за период од две недели.

Проверете го здравјето на миленикот

Ако морате да го однесете миленикот на ветеринар, немојте да го одложувате тоа.

Поради моменталната ситуација, најдобро е да му се јавите на ветеринарот и да закажете термин, наместо да правите метеж во ординацијата.

Сепак, доколку миленикот е со добро здравје, периодов прескокнете ги прегледите.

Бидете внимателни кога го шетате миленикот

Ако имате мачка, најдобро е воопшто да не ја пуштате надвор овој период.

Но, ако имате куче, морате да го изнесете надвор. Кога ќе го правите тоа, држете се до сите препораки за заштита и спречување на ширењето на вирусот.

Засега нема конкретни насоки за миленици, но и без тоа можете да бидете претпазливи. Избегнувајте контакт со други кучиња и други луѓе и прошетките нека траат што е можно пократко.

Мијте ги рацете

Иако од СЗО велат дека милениците не го пренесуваат вирусот, најдобро е да се миете раце пред и откако ќе си играте со миленикот. На овој начин ќе го заштитите од други болести и инфекции.

Спирова С. | Црнобело