Зошто кучињата сакаат да ги закопуваат коските и дали се безбедни за вашето милениче?

Сте се запрашале ли зошто кучињата ги закопуваат коските, или зошто воопшто сакаат коски? Причината за ова однесување се всушност нивните предци.

Ако имате куче сигурно сте забележале дека откако ќе му дадете коска, тоа ќе почне да ја глода, a набрзо потоа ја закопува. Ако чувате куче дома, голема е веројатноста тоа да пробало да ги скрие коските под тепихот, ќебето или нешто слично.

Па која е причината за ова однесување?

Зошто кучињата сакаат да глодаат коски?

Пред нивното припитомување, кучињата се хранеле во група, слично како волците, и исхраната им се состоела од месо. Тие заедно напаѓале плен, го убивале и ги јаделе месото и коските. И денес дивите кучиња се однесуваат на истиот начин.

И на припитомените кучиња им е потребно месо, но бидејќи повеќето луѓе ги хранат со специјална кучешка храна, понекогаш им недостасуваат хранливите состојки од месото, па глодањето коски им помага да надополнат за тоа.

Еволуцијата ги направила кучињата одлични ловци и тие ја имаат потребната „опрема“ за глодање коски – силна вилица и остри заби. Дури и припитомените кучиња имаат инстинкт да ги користат вилицата и забите за нивниот „плен“ - во овој случај коските што ги добиваат од сопствениците.

Покрај тоа, за кучињата коските имаат и одличен вкус.

Зошто кучињата ги закопуваат коските?

Како што напоменавме, пред да бидат припитомени, кучињата ловеле. Нормално, никогаш немале гаранција дека секој ден ќе успеат да уловат нешто, па си чувале дел од пленот за подоцна. А, за добро да ја скријат храната од другите животни, тие ја закопувале.

Вашето куче секојдневно има храна, но кога ги закопува коските, кај него проработува неговиот природен инстинкт. Уличните кучиња, од друга страна, ги кријат коските за подоцна, слично како нивните предци.

Дали е добро да им давате коски на кучињата?

Ветеринарите сметаат дека коските се добри за кучињата – со нив тие можат да си ги исчистат забите и да внесат повеќе калциум и минерали во организмот. Наводно, коските биле добри и за дигестивниот систем и столицата на кучињата.

Кога станува збор за видот на коски, ветеринарните препорачуваат да не му давате варени коски, или коски од кокошка и мисирка. Причината е што овие коски се лесно кршливи и можат да предизвикаат сериозен проблем.

Не би требало да претставува проблем да му давате коски на вашето куче, сè додека обрнувате внимание на препораките. Но, најдобро е да се консултирате со ветеринар пред да донесете одлука, бидејќи сепак за секоја раса на куче си има различни правила.

Спирова С. | Црнобело