Зошто мачките вршат нужда надвор од кутијата со песок и како да се справите со овој проблем?

Мачките се можеби „најчистото“ домашно милениче – сами се грижат за нивната хигиена, не прават неред и речиси веднаш учат каде треба да вршат нужда.

Но некогаш, мачките одбиваат да ја користат кутијата со песок и уринираат низ целиот дом. Па, која е причината за овој проблем и како да се справите со него?

Дали оваа појава е нормална?

Ако имате ново маче кое уште не е привикнато на домот, може да се случи да изврши нужда на друго место, наместо во кутијата со песок. Обично овој проблем ќе исчезне сам, штом мачето се привикне на новата околина.

Но некогаш и мачката што ја чувате долго време може да почне да врши нужда надвор од кутијата. Во овој случај треба да ја најдете точната причина за ова однесување за да можете да го решите проблемот.

Медицински причини

Најпрво важно е да ја однесете мачката на ветеринар за да утврдите дали можеби има здравствен проблем што го поттикнува ова однесување. Постојат многу здравствени проблеми што можат да го предизвикаат ова, а најчестите се:

• Камења во бубрезите
• Инфекција на уринарниот тракт
• Воспаление
• Болест на бубрезите или дробот

Немедицински причини

Ако ветеринарот утврди дека вашата мачка е со одлично здравје, тогаш постојат други можни причини:

На мачката не ѝ се допаѓа кутијата. Возможно е на мачката воопшто да не и се допаѓа самата кутија со песок или нејзината локација.

На мачката не ѝ се допаѓа песокот. Има разни видови песок за мачки, па ако мачката ја избегнува нејзината кутија и врши нужда на друго место, можеби не ѝ се допаѓа песокот што го купувате.

Обележување територија. Некогаш мачките си ја обележуваат нивната територија со урина. Ова може да се случи ако мачката е во сезона на парење или ако е под стрес поради голема промена, како селење, нов член во семејството, ново милениче и слично. Обично обележувањето територија се разликува од обичното уринирање – тогаш мачката ја прска урината на вертикални површини и најчесто не остава траги на подот.

Што можете да направите?

Кога не станува збор за медицински проблем, можете да направите неколку работи за да ја натерате мачката да ја користи кутијата со песок.

Сменете ги кутијата и песокот. Ако ова е причината, штом ќе ги смените кутијата и песокот, мачката би требало да почне да ги користи.

Сменете ја локацијата на кутијата. Во овој случај најдобро е да ја ставите кутијата на место каде што мачката веќе уринирала во домот, бидејќи ќе знаете дека тоа место сигурно ѝ се допаѓа.

Редовно чистете ја кутијата. Не заборавајте дека изметот мора да го собирате секој ден, а целиот песок менувајте го еднаш неделно. Ако кутијата е многу валкана, мачката нема да сака да ја користи.

Стерилизација. Стерилизирањето на мачките е препорачливо од многу причини – најмногу за да се спречи нивното размножување, а со тоа и да се намали бројот на мачки кои завршуваат на улица. Истовремено, стерилизираните мачки речиси никогаш не обележуваат територија со урина.

Како да го отстраните мирисот од домот?

Штом ќе најдете решение за проблематичното однесување на мачката, ќе мора и добро да го исчистите домот. Проблемот е што урината на мачките мириса многу лошо и некогаш е тешко да го отстраните мирисот. Затоа, кога ќе го чистете домот земете ги предвид следниве нешта:

Користете студена вода. Штом ќе го најдете местото на коешто уринирала мачката, истурете студена вода, а потоа соберете ја со крпа или што било слично без да триете.

Неутрализирајте ги мирисите. Можете да направите раствор од вода и оцет во ист размер. Откако ќе ја соберете водата, испрскајте го местото со растворот, а потоа можете да додадете и малку сода бикарбона. Овој метод е одличен ако се обидувате да чистите мека површина, како тепих или кауч.

Не користете амонијак. Избегнувајте да чистите со средства кои содржат амонијак. Причината е тоа што урината на мачките содржи амонијак, па ако чистите со такво средство, поради мирисот, мачката најверојатно повторно ќе уринира на истото место.

Спирова С. | Црнобело