Не чувствуваат вина, туку страв од казна - популарни митови и факти за кучињата

Кучињата не гледаат црно-бело, а кога ја ставаат шепата на вашата нога или рака, навистина ви искажуваат љубов.

Кучињата се едни од најпосакуваните домашни миленичиња, но и покрај ова, за нив кружат многу митови кои не се воопшто точни.

Поради ова, тиктокерот кој ѝ е познат на јавноста како Knowledgesaurus направил видео во кое споделува дел од најпознатите митови за кучињата и открива кои од нив се вистина, а кои лага.

Во кои митови верувавте вие?

Факт: Кучињата сакаат да гледаат во сопствениците кога одат во тоалет

Веројатно сте забележале дека кога кучето оди во тоалет, скоро секогаш сака да биде свртено кон вас. Причината за ова е едноставна – во овие мигови, кучињата се чувствуваат мошне ранливо, па гледањето во вас им нуди чувство на безбедност.

Мит: 1 кучешка година е 7 човечки

Ова е доста популарен мит, но кога станува збор за претворање „кучешки“ во „човечки“ години, нештата се покомплицирани, најмногу поради различното темпо на развој кај кучињата.

Според експертите, првата година од животот на кучето е исто како 15-тина човечки. Втората година, пак, е околу девет човечки. Потоа, секоја кучешка година е околу 4 или 5 човечки.

Мит: Кучињата гледаат црно-бело

Видот на кучињата дефинитивно е поразличен од човечкиот, но воопшто не е точно дека тие гледаат само црно-бело. Кучињата можат да гледаат бои, но само сина, жолта и нијанси на сива. Тие не можат да ги перципираат црвената, виолетовата и портокаловата боја.

Факт: Кучињата не чувствуваат вина

Можеби вашето куче ќе ве убеди дека чувствува вина за грешката што ја направило, но досега ниту едно истражување не потврдило дека кучињата навистина чувствуваат вина.

Обично кога луѓето чувствуваат вина за нешто, се обидуваат да не го повторат бидејќи знаат дека со тоа повредиле некого. Кучињата, од друга страна, веројатно се свесни дека направиле грешка само затоа што знаат дека ќе бидат казнети. Па, се претпоставува дека тие не чувствуваат вина, туку страв од казната.

Факт: Кучињата љубоморат

Можеби не чувствуваат вина, но експертите веруваат дека кучињата дефинитивно чувствуваат љубомора. Ова е можеби најизразено во ситуации кога нивниот сопственик гали или си игра со друго куче, па дури и кога сопственикот ѝ обрнува повеќе внимание на друга личност отколку на кучето.

Факт: Кучето ви изјавува љубов со неговата шепа

Кога кучето ќе ја стави неговата шепа на вашата нога или рака, особено додека го галите, тогаш ви изјавува љубов, односно ви ја покажува неговата наклонетост.

Факт: Кучето многу добро ја знае вашата рутина

Ако имате рутина што ја следите секој ден, вашето куче дефинитивно ја знае многу добро. Тоа знае кога излегувате за на работа, кога се враќате и, најважното за него, точно знае кога му е време за јадење или прошетка.

Мит: Кучињата јадат трева кога се болни

Многу животни, вклучувајќи ги и мачките и кучињата, сакаат да јадат трева, но не само затоа што се болни. Иако некои експерти сметаат дека кучињата јадат трева кога чувствуваат дека имаат проблеми со стомакот и дигестијата, најчесто тие го прават ова бидејќи им е забавно.

Спирова С. | Црнобело