Ирвасите си ја менуваат бојата на очите и уште 7 животни кои развиле „супермоќи“

Нилските коњи имаат природна заштита од сонце

За нилските коњи може да се каже дека си имаат природен заштитен крем од сонце.

Тие можат да поминат часови под жешкото сонце, а да не почувствуваат никакви последици од тоа.

Оваа заштита им ја нуди течност што ја лачи нивната кожа, нарекувана и „пот на нилски коњ“.

Течноста има молекуларна структура што ја распрснува сончевата светлина, па така ја штити кожата од штетните зраци.

Течноста, односно секретот има црвенкаста нијанса поради црвените и портокаловите пигменти.

За овие пигменти, пак, истражувањата покажале дека можат да ја апсорбираат ултравиолетовата светлина, нудејќи уште поголема заштита на кожата.

Змиите имаат сензор за топлинско зрачење

Змиите можат да го почувствуваат вашето присуство само од топлината што ја зрачи вашето тело.

Некои видови змии се опремени со сензори за топлинско зрачење со кои можат да ја детектираат топлината на некое суштество на растојание и од неколку метри.

Змиите всушност го „гледаат“ инфрацрвеното зрачење што кај топлокрвните суштества се оддава како топлина.

Овие сензори на змиите се наоѓаат на предниот дел од нивната уста, речиси веднаш под ноздрите.

Лососот има уред за навигација

Лососите го користат магнетното поле на Земјата за да се ориентираат или, со други зборови, си имаат вграден уред за навигација.

Токму со овој уред овие риби знаат кон каде да се движат и минуваат огромни растојанија без да се изгубат.

Според истражувањата, лососот има микроскопски кристали на магнетит во ткивото. За магнетитот се верува дека е можеби најмагнетизираниот минерал кој се наоѓа на Земјата.

Експертите сметаат дека магнетитот во ткивото на лососот реагира на магнетното поле на Земјата со што им „кажува“ на рибите во која насока да се движат.

Потребни се повеќе истражувања за целосно да сфати овој механизам кај рибите, но и со она што веќе го знаеме станува јасно дека ова е навистина импресивна супермоќ.

Делфините можат да „исклучат“ една хемисфера од мозокот

Делфините спијат поразлично од повеќето цицачи. Кога е време за спиење, тие можат да ја „исклучат“ едната хемисфера од мозокот и да го затворат само спротивното око.

Односно, ако „спие“ десната хемисфера, ќе го затворат левото око, и обратно.

Додека спијат, „будната“ хемисфера ја набљудува нивната околина и го контролира дишењето.

Во период од 24 часа, делфините ја одмараат секоја хемисфера по околу четири часа.

Постојат неколку причини зошто делфините спијат вака. Најпрво е дишењето – тие постојано свесно го контролираат дишењето, што значи мораат да го прават тоа и додека спијат.

Втората причина е нивната безбедност – кога се практично полу-будни, полесно ќе можат да воочат некоја опасност и да избегаат.

И трето, овој начин на спиење им овозможува на делфините да изведуваат мали движења со кои ја регулираат температурата на телото додека се во студената вода.

Спирова С. | Црнобело