Знаци кои укажуваат на тоа дека сте се оддалечиле со партнерот

Во периодот пред да ставите крај на врската со партнерот, сигурно сте поминале низ фаза во која се прашувате што тргнало наопаку и кога толку сте се оддалечиле.

Кога ќе ги имате одговорите на овие прашања, одлучувате дали е време за вистински крај или ви треба само пауза еден од друг. Понекогаш, особено кај подолгите врски, се прашувате како е можно некој кој ми бил толку близок сега да го чувствувам толку туѓ и далечен? Дали е тоа причината што се чувствувам вака или нешто друго?

Овие неколку знаци укажуваат на тоа дека постепено се оддалечувате со партнерот:

Еден од вас постојано бара повеќе простор за себе

Во фазата на отуѓување или презаситеност еден од друг, обично еден партнер, а понекогаш и двајцата, постојано потенцираат дека им треба повеќе време за себе.

За да го решите овој проблем, разговарајте отворено и договорете се како ќе продолжите понатаму.

Често се јавува нервоза

На почетокот на врската, сите оние мали маани кај партнерот ви беа симпатични, па дури и не ги ни забележувавте после некое време. Но, во последно време се нервирате зошто не се измиени садовите или зошто не ви одговорил на пораката. Нервозата е до тој степен голема, што почнувате кавга за сé што ви лежи на душа.

Ова е дефинитивно знак дека ви треба малку одмор еден од друг.

Се криете зад телефоните

Толку многу одбегнувате конфронтација и вистински разговор, што заедничкото време го поминувате загледани во телефоните, или пак комуницирате само преку пораки. Ова може да укажува на презаситеност и потреба да бидете сами.

Седнете и отворете ги картите како возрасни, па решете што понатаму.

Почесто мислите на минатото, отколку на иднината

Првиот состанок, првиот бакнеж, првото заедничко патување се спомени на кои често се навраќате и тоа е во ред. Но, ако постојано мислите како било некогаш, а не како ќе биде во иднина, можеби нешто не е во ред во врската. Размислете каде сте биле, што сте постигнале и како и дали можете и сакате да го поправите односот.

Одговорот на овие прашања ќе ви каже што треба да направите следно.

М. В. | Црнобело