Зошто го одбив за втора средба?

Секој има свои причини поради кои не сака да излезе на втор состанок со некого. Сепак, овие се, признаваат и самите девојки кои не се согласиле на повторна средба заради нив - поприлично глупави.

Запрашани да ја откријат причината поради која го одбиле додворувачот за уште едно видување, неколку припаднички на понежниот пол ги наведоа следните:

„Не отидов на втора средба со фраерот, бидејќи на првата се појави во чевли со мала потпетица, кои нонстоп тропкаа по подот како да се женски. Ми беше многу непријатно цело време. Се разбира, ни самиот фраер не беше нешто посебно, ама чевличките пресудија.“

„Бидејќи му заѕвоне мобилниот телефон, а од звучникот почна да ечи турбофолк музика. Тоа не е нешто кое сакав некогаш да ми се повтори.“

„Бев на состанок со дечко кој не се ни фати за паричникот кога требаше да ја платиме сметката. Дури не ни глумеше дека го бара, ме пушти мене сѐ да платам. Во суштина, тоа воопшто не е глупава причина за одбивање на втора средба.“

„Го одбив за повторна средба, бидејќи типот сакаше уште веднаш да направиме селфи и чек-ин во кафулето каде седeвме. Не знам дали намерата му беше да докаже дека излегол со девојка, или, пак, само е многу чуден лик, но во секој случај, вториот состанок веќе не беше опција.“

„Еден фраер со кого бев на средба, толку гласно, брзо и ненаситно јадеше, што мислев дека ќе ми се слоши уште на првиот состанок.“

„Затоа што имаше пискаво гласче и ми беше ужасно непријатно да бидам видена со него во јавност. Знам дека не е убаво од моја страна, ама не можев.“

Глупави или разумни причини – кое е вашето мислење?

М. А. | Црнобело