„Не сакам фраер, туку маж што ќе ме слуша!“

Во кино сала и пред малите екрани, можеби припадничките на понежниот пол ќе воздивнуваат по мускулестото тело на Крис Хемсворт, ќе се изгубат во небесно сините очи на Бредли Купер, или, пак, фантазираат за Џејми Дорнан во добро скроеното сиво одело. Но, каков маж навистина им треба? 

Во вистинскиот живот, нивните очекувања од мажите се сосема поинакви, откриваат резултатите од најновото британско истражување, според кое на жените им се најпотребни партнери кои умеат да слушаат.

„Гајле ми е за плочките на стомакот, скапата гардероба и брзите автомобили. Кога ќе си дојдам дома, сакам мојот маж да ме слуша.“

Припадниците на посилниот пол можат со часови да зборуваат за фудбал, да бистрат политика, или, пак, да водат расправа за омиленото пиво со нивните другари.

Меѓутоа, кога треба да поразговараат за врската со својата партнерка, тие не можат да одржат концентрација подолго од шест минути.

Постојат мноштво експертски објаснувања зошто одредени мажи не сакаат да ја слушаат партнерката. Едни веруваат дека жените им се обраќаат единствено кога треба да им решат некаков проблем.

„По пеколниот ден на работа, одвај чекам да си дојдам дома и да му се пожалам на саканиот. А, тој ме прекинува после третата реченица. Ми држи лекции како треба да разговарам со шефот и да се изборам за поголема плата. Не сакам да ги решава моите проблеми. Сакам да ме дослуша што имам да кажам.“

Други мислат дека со внимателно слушање на „жалопојките“ од девојката или сопругата, само ќе ја поттикнат уште повеќе да се жали, па сакаат таквото однесување да го oтсечат од корен.

„На бившиот дечко му велев дека би била најзадоволната жена на светот, само ако ми обрне повеќе внимание додека зборувам. Ме гледаше немо и збунето, како да говорам странски јазик што тој не го разбира. Потребно ли е воопшто да објаснувам зошто веќе не сме заедно?“

Мнозинството мажи, пак, се чувствуваат непријатно во улогата на слушатели, бидејќи воспитувани се со уверението дека тие не смее да покажуваат слабост и сочувство.

„Отворено го прашав сопругот зошто не сака да ме сослуша кога имам некаков проблем. Неговиот одговор беше: „Драга моја, јас сум маж! Ние решаваме проблеми. Не ги слушаме. Ако сакаш некој пасивно да те слуша, викни си ги пријателките.““

Наспроти мислењето на мажите, жените ги сметаат за привлечни оние што ја поседуваат оваа особина.

„Според мене, нема ништо попривлечно од маж што знае да слуша. Запознав неколку типови кои се свесни за ова. И сите имаат богат сексуален живот.“

М. А. | Црнобело