Автосексуалност - кога љубовта кон себе ќе ги потисне сите други видови на љубов

Денес слободно можеме да кажеме дека човечката сексуалност е флуидна и многу покомплицирана отколку што се верува. Постои широк спектар на љубовни односи – од асексуални личности, кои имаат романтични врски без сексуални односи, до комплицирана структура на полиаморија, во која не постои моногамија, туку поединечни правила. Иако ова не е нов поим, во последниве години сè повеќе се зборува за автосексуалноста и за автосексуалците.

Некои терапевти и сексолози тврдат дека автосексуалност е посебна сексуална ориентација, која сè уште не е признаена, но дека не треба да се меша со нарцисоидно нарушување на личноста.

Едноставна дефиниција за автосексуалноста би била привлечност што една личност ја чувствува кон себе. Автосексуалците можат да имаат емоционални врски, како и сексуални односи со други луѓе, но најголемата возбуда ја чувствуваат кога го гледаат сопственото тело во огледало или кога фантазираат за своето тело.

Самиот поим, како и неговата дефиниција, потекнува од 1989 година, кога психотерапевтот Бернард Апфелбаум кај некои од своите пациенти забележал дека имаат тешкотии да привлечат други луѓе и дека најголем степен на задоволство чувствуваат кога мастурбираат.

Покрај автосексуалноста, постои и термин сологамија или брак со самиот себе. Ова не се практикува често, иако е зголемен број на луѓе кои велат „да“ на самите себе, иако е ова илегално насекаде во светот.

Една јапонска компанија нуди пакети за луѓето кои се во брак со самите себе, како и за жените кои се незадоволни од претходните бракови.

Застапниците на овој феномен велат дека сологамија е љубов кон себеси и прифаќање на социјалната афирмација, која обично е резервирана за двојките што се во брак.

Оваа посебна практика би можела да се гледа како екстремно проширување на љубовта и грижата за себе, додека автосексуалноста ја покрива сексуалната привлечност кон себеси.

Постои и авторомантика, која претставува романтичен однос со себеси. Гиа Витале е една од авторките која пишува за овој феномен, а се идентификува како автосексуална и авторомантична личност. 

Ова значи дека покрај сексуалната привлечност кон сопственото тело, таа исто така чувствува романтичен копнеж кон себеси, како полноправна личност.

Ашера | Црнобело