Ревиите на втората вечер на Shtip Fashion Days 2025

На 11 октомври, модата продолжи да дише.

Вториот ден започна со емоција омаж на Фросина Кулакова, младата дизајнерка чие име останува синоним за светлина. Нежна музика ја исполни салата, додека модели со поетични креации се движеа низ просторот како одрази на нејзината душа. Иако Фросина повеќе не е меѓу нас, преку своите дизајнерски парчиња таа продолжува да живее, секој материјал, секој изглед ја раскажува нејзината приказна. Преку уметноста, таа добива вечност. Секое парче зборуваше за нежност, искреност и тивка инспирација. Публиката почувствува дека убавината не исчезнува, таа само менува форма, ревијата заврши со солзи и стоечки аплауз, емоција што ја обедини салата во еден глас на благодарност и почит.

Следеше Софија Петрова со „Паралелни одрази“ ревија што ја истражуваше флуидноста на идентитетот. Контрасти меѓу светлина и сенка, структура и мекост, сила и ранливост. Моделите се движеа како делови од една личност што се огледува во различни светови. Публиката замолкна, зашто модата зборуваше со филозофска тишина.

Студентите од Универзитет „Св. Кирил и Методиј“ Скопје, под менторство на проф. Лидија Георгиева, ја претставија колекцијата „Одбери ја твојата бајка“. Футуристички мотиви, алтернативни бајки и визуелни приказни што ја спојуваат реалноста и сонот. Видовме облека надвор од нормалата, парчиња кои со секој чекор на моделите се обликуваа по нивното тело, како да се живи, дишат и реагираат. Колекцијата потсети дека секој од нас пишува своја приказна и дека токму модата е еден од нејзините јазици.

Потоа на сцената се појави Албатрос со „The Confident Edit“ класика со современост. Беспрекорни кроеви и едноставна елеганција што не бара внимание, туку го заслужува. Тоа беше манифест на самодовербата како најсилен моден израз. Секој модел ја носеше енергијата на чистата, македонска естетика, претставена преку моќта на линијата и едноставноста. Албатрос потсети дека модата не мора да биде гласна за да остави впечаток.

Следуваше Фокабо бренд со над петдецениска приказна, кој повторно го потврди своето место како симбол на машка префинетост и стил. Современи силуети, класични кроеви и чувство за достоинство ја исполнија пистата со енергија. Песните што одекнуваа за време на ревијата ја подигнаа атмосферата, а во салата владееја насмевки и аплауз. Кога на крај на пистата излезе и добро познатиот Миро Кацаров, салата ја облеа шок и радост, како финален потсетник дека модата и музиката се два јазика на истата енергија.

Вечерта ја затвори Astibo Basic, бренд што го симболизира срцето на Штип. Колекцијата есен/зима 2025 донесе комбинација од едноставност, топлина и стил приказна за луѓето што живеат мода секој ден, без да ја наметнуваат. Astibo не само што ја претстави својата нова колекција, туку го потсети градот на неговата ткаенина на идентитетот, дека модата овде не е само професија, туку традиција и приказна што трае.

Кога последниот модел ја напушти пистата, просторот се испразни, но во воздухот сè уште се чувствуваше ритамот на изминатите два дена.

Сите во публиката, дизајнери, модели, гости и љубители на модата имаа исто чувство: гордост.

Гордост што токму нашиот град, Штип, во тие два дена стана центарот на модата, место каде што бесконечноста на креацијата доби свое срце и свој дом.

фото: Владимир Димитров