Мажи во кратки комбинезони - нов тренд на летото?! (фото + видео)

Единственото парче облека кое досега недостасуваше во машкиот гардеробер, пристигнува баш во вистинското време - во пресрет на топлите денови и летните фестивали.

Какви кошули, поло маици и панталони? Според визијата на модниот проект RompHim, мажите оваа година би требало храбро да прошетаат низ градот во жешки комбинезони. Со куси ракави и шорцеви, тие ќе им овозможат слободно да се движат, а притоа да не загубат од мажественоста. Или, не?

Модниот бренд АCED Design од Чикаго ги претстави кратките комбинезони за мажи на KickStarter, а колку и да звучи смешно идејата, момците кои стојат зад проектот веќе собрале четирикратно повеќе пари од планираната сума.

Кратките комбинезони се спој од панталончиња и летна кошула, а достапни се во пастелни бои и весели дезени, со прилагодлив струк, џебови од предната и задната страна, како и моженост да ги облечете во само еден потег.  

„Си седевме една вечер, пиевме пиво и разговаравме околу опциите за машката облека.“ - напишаа на страницата KickStarter школските пријатели кои го основале брендот. - „Се запрашавме зошто не постои некое парче во кое и мажите ќе бидат модерни, без да ја жртвуваат удобноста. А, сите наши критериуми нè доведоа до идејата да го направиме првиот машки комбинезон.“

Сепак, машкиот комбинезон и не е некоја новина. Како најзапаметен останува светло синиот, уште пократок модел, во кој без проблем се појави Шон Конери на големото платно, односно во филмот „Goldfinger“ од 1964 година, покажувајќи им ги на обожавателките разголените нозе.

Производот привлече големо внимание во јавноста, па овие денови многубројни светски медиуми веќе пишуваат за кратките машки комбинезони, а секако, сосема очекувано - мислењата се поделени.

Како вам ви се чини оваа идеја?

М. А. | Црнобело