Препорака од прва рака: Помалку познати локации во Париз, кои вреди да ги посетите

Париз на многумина од нас ни ги има освоено сетилата и постојано нè мотивира да го посетуваме одново и одново.

Ако веќе си бил во оваа француска метропола и си ги посетил Ајфеловата кула, Триумфалната капија, Лувр, плоштад Конкорд, катедралата Нотр Дам, Пантеон, Дизниленд… Постојат уште многу интересни локации, не толку познати, кои ќе ти ја продлабочат сликата за Париз и несомнено ќе ти обезбедат пријатни спомени со кои ќе се вратиш дома. 

59 Риволи

Овој култен локал се наоѓа во самиот центар на Париз и од напуштена зграда прераснал во простор за уметници и културни настани. Во него има околу 30 уметнички студија, половина се на постојани уметници, а другите се на привремени, кои отседнуваат во период од 3 до 6 месеци.

На самото место можеш да позборуваш со некој од артистите, да купиш некое нивно дело и од прва рака да видиш како создаваат. Понекогаш за време на викендите знае да има и по некој концерт, но тоа најчесто се случува во летниот период.

Jardin d’Acclimatation

Ако Дизниленд веќе ти е посетен и патуваш со деца, тогаш можеш да му дадеш шанса на забавниот парк Jardin d’Acclimatation, кој има околу 40 атракции, едукативни игри и ресторани, продавнички за сувенири, 500 животни (егзотични птици, кози, зајаци…).

Овој простор на 18 хектари, со големо пространство на трева, ќе ви го исполни денот со многу адреналин, забава и вкусни закуски.

Фондација Луј Витон

Покрај толку многу уметнички галерии и музеи што постојат во Париз, тука е и Фондацијата Луј Витон која посветена на современата уметност во историска перспектива.

Отворена е пред околу десет години, фондацијата има за цел да ги направи уметноста и културата достапни за сите.

Во зависност од програмата може да бидете дел од изложби од модерна и современа уметност, од создавање на уметност на самото место и како голем број на концерти, перформанси, филмски проекции…

Уличките на Монмартр

Сигурно на вашата прва посета во Париз ја имате посетено базиликата Сакр-Кер, но кога веќе повторно си во оваа метропола одвој неколку часа за ноќна прошетка низ брдото кое ќе ти овозможи поглед на целиот град.

Има преголем избор на интересни локали, каде можеш да се напиеш чаша вино и да уживаш во животот на вистински начин.

Национална библиотека на Франција

Ако си љубител на пишаниот збор тогаш треба да ја посетиш Националната библиотека на Франција, која се смета за една од најважните библиотеки во Франција и една од најстарите во светот.

Кралската библиотека на Шарл V во дворецот Лувр се почетоците на оваа установа, која со текот на вековите прераснала во едно од најважните книжевни центри во светот.

Пер Лашез

Можеби на некого ќе му биде чудно, но во Париз се наоѓаат и познатите гробишта Пер Лашез каде почиваат едни од најголемите великани на светот.

Од Џим Морисон, Оскар Вајлд, па сè до Шопен, Марсел Пруст како и ред други писатели, актери, музичари, политичари, научници… Два-три часа се сосема доволно да се изгубите помеѓу вечните почивалишта на луѓето кои придонеле многу во уметноста, а и генерално во светот.

©CRNOBELO.com Забрането преземање и копирање. Крадењето на авторски текстови е казниво со закон.

Е. Х. | Црнобело