Подземен град, летање со балон - Зошто треба да ја посетите Кападокија?

Кападокија е местото каде што природата и историјата се спојуваат и ги создаваат најуникатните пејзажи во светот. А, најубаво време за посета е токму пролетта.

Пејзажот од вулкански карпести формации наречени „самовилски оџаци“ и неговите долини и кањони е најубавото нешто што останува врежано во меморијата на сите кои ќе ја посетат Кападокија.

Сместена е во централна Турција, а најпозната е по балоните со топол воздух. Доколку решите да го посетите овој регион, Кападокија е место што не треба да го пропуштите.

Најдобриот период од годината за летање со балон на топол воздух во Кападокија е од април до октомври кога времето е топло, а небото ведро, што создава идеални услови за вистинско уживање и создавање нови спомени.

Долините на волшебната Кападокија се особено убави во пролет, кога цветаат диви цвеќиња.

Освен колоритните балони, Кападокија стана и една од омилените туристички дестинации поради својата историја.

Регионот има неколку подземни градови, кои во голема мера ги користеле раните христијани како скривалишта.

Кападокија е покриена со седиментни карпи формирани од езера и потоци.

Карпите наликуваат на столбови и форми слични на минаре, а се резултат на еродирањето кое се одвивало во период од милиони години.

Областа каде што се наоѓа Кападокија уште ја нарекуваат музеј на отворено, а помеѓу 300 и 1200 година од нашата ера се развила и во монашки центар.

Tоа е комплекс кој се состои од повеќе од 30 карпести цркви и капели кои содржат извонредни фрески, кои датираат од 9 до 11 век.

В. К. | Црнобело