Странец препорачува топ 7 работи во Македонија за активен одмор

Од нуркање во Охридското Езеро до јавање коњи во Маврово и параглајдинг од Галичица, што препорачува Џејсон Кејн?

Џејсон Кејн вели дека во Македонија ќе видите неверојатни пејзажи, ќе вкусите прекрасна храна и ќе уживате во убаво вино.

Планини кои се издигнуваат до небото, чисти езера и многу можности за зависниците од адреналин.

Какви активности препорачува тој во, како што вели, „Бисерот на Балканот“:

Искачување на Водно и кањонот Матка

На 15 минути од градот ви е планината Водно со добро одбележани патеки, зеленило и задолжително е искачување до Милениумскиот крст, еден од најголемите христијански крстови.

Имате панорамска слика на градот, а потоа мора да продолжите кон Матка, каде ќе истражувате стари манастири од кои некои изградени пред 17-тиот век.

Кајакарење на Матка, во Охрид и Преспа

Прекрасната боја на водата и карпите околу ќе ви дадат неверојатно доживување додека кајакарите на Матка.

Инаку, ако сакате забава на вода треба да ги посетите и Охридското и Преспанското Езеро каде ќе можете да се возите со бротче или да се забавувате во водени спортови.

Параглајдинг

За да ја доживеете природната убавина на Македонија од уникатна перспектива одлучете се за параглајдинг и скокнете од 2.254 метри надморска височина од Галичица.

Ќе уживате во глетката кон двете езера, кон блиските села и шумата.

Нуркање кај Заливот на Коските во Охрид

Ако сакате епско искуство и истражување на подводниот свет, нуркајте во Охридското Езеро.

Инаку, Заливот на Коските е одлична реконструкција на праисториска наколна населба.

Јавање коњи

Излезе од градовите и јавајте коњи во Маврово. Запознајте се со локалците и со нивните традиционални рецепти. Почувствувајте ја поврзаноста со природата.

Скијање

Во Македонија има одлични ски терени и за почетниците и за поискусните.

Посетете ја Попова Шапка, а и највисокиот град во Македонија Крушево, кој се наоѓа на 1.350 метри.

Возење велосипед по планинските патеки

Ова ќе биде рајско игралиште за вљубениците во велосипедизмот. Возете на Шар Планина, Галичица и Маврово.

Ќе видите прекрасни пејзажи до планинските врвови. И не заборавајте да дегустирате во Демир Капија.

Оригиналната статија прочитајте ја тука!

С. С. | Црнобело / фото: depositphotos.com