Приказни за Кратово или градот на кулите, мостовите и легендите
Секој викенд е нова шанса да се замине на некоја еднодневна екскурзија.
Пред неколку недели заедно со неколку пријатели за првпат решивме да го посетиме Кратово - градот на кулите, мостовите и фиќовците. Можеби тоа требаше да го сторам многу порано.
https://www.instagram.com/p/BvMuY-egqPJ/
Само што пристигнав имав чувство дека сум некаде далеку. Во некоја друга земја. Набљудував во она што се случуваше и што ми се испречуваше. Во старите луѓе кои не го симнуваа погледот додека со обесени фотоапарати околу врат поминувавме покрај нив. Сигурно мислеа дека сме некои странци.
Ме исполни пријатно чувство додека шетав низ тесните и камени сокаци. Мислам дека тој ден сите луѓе беа излезени надвор. За тие неколку часа успеавме да ги поминеме сите мостови: Грофчанскиот мост, Чаршискиот, Јоркширскиот Аргуличкиот и, најпознатиот, Радиниот мост.
Тука ќе ве потсетам на легендата за Радиниот мост, поточно за соѕиданата Рада, која била жртвувана за да може да се изгради мостот. Пред самиот свршувачки чин таа извикала да ѝ ја отсечат десната града, за да може да го дои своето машко дете. Познато звучи, нели?
Исто така мора да ги споменам и кулите, кои се своевиден симбол за Кратово. Некогаш биле 13, а денес има останато само шест и тоа: Саат-кула, Златкова, Емин-бегова, Крстева, Симиќева и Хаџи-Костова кула.
На времето во нив живееле семејствата на закупниците на рудниците, и под нив има изградено тунели и подземни ходници.
Од која и страна да гледаш, тешко е да се остане незабележан во Кратово. Целата атмосфера ми беше интересна, ме потсетуваше на кадар од некој филм.
Од секоја улица ѕирка минатото, кое останало, и кое никогаш нема намера да си замине. И прошетката да биде комплетирана, посетете ја и црквата „Св. Јован Опсечен“. Обновена во 1836 година, а кратовчаните ја нарекуваат и женска црква.
Доволно е до тука. Најважно е да се заскокотка љубопитноста и да се преземе соодветна акција. Одлука да се посети ова гратче и тоа во најскоро време.
Не знам како другите го доживуваат, но за мене Кратово е место создадено од приказни и знам дека нешто постојано ќе ме навраќа да се вратам таму.
Автор: Евгениј Хоуп | Црнобело
Би можело да ве интересира:
Препорачуваме
Најчитани неделава
