Непријатни ситуации кои можат да ви се случат за време на патување

Ако мислите дека патувањето е нешто што цело време е пропратено со пријатни работи, мора уште на самиот почеток да ви кажам дека се лажете. Не е сè така розово како што си замислуваме.

Тоа не значи дека секој поминува низ истите случки, но постојат можности и настани, кои едноставно не можат да се избегнат или во краен случај им се појавуваат на поединци, оние народски кажано кои се „малери“.

И тогаш никогаш со сигурност не знаеме кого да обвиниме. Можеби сме се нашле во таков склоп на околности, или нештата се случиле без да можеме на каков било начин да го смениме. Но, постојат и ситуации за кои едноставно самите сме си виновни.

Во продолжение следува листа на работи кои пробуваме да ги игнорираме и избегнеме додека се наоѓаме далеку од нашите домови:

Се радуваме на помисла дека се наоѓаме помеѓу облаците, илјадници метри над почвата. Тоа не е секојдневно искуство. Никој не сака кога авионот ќе се најде во турбуленција, кога ушите ќе почнат да ни пиштат, а ние во главите ќе си режираме фатални сценарија.

На ова ќе се надоврзе и патување со брод и соочување со морска болест. Не сме сите со „јаки стомаци“. Може да нè фати и паника кога ќе сфатиме дека се наоѓаме на сред море или океан, а околу нас има само водна површина и ништо друго.

Многу често премногу размислуваме додека патуваме. Тоа нè дестабилизира и оптоварува во секој можен поглед. Дали ги заклучив вратите од апартманот? Дали го исклучив шпоретот? Дали на време ќе стигнам на аеродром?

Бескрајна низа од прашања, повеќе ни влева паника, отколку што ни овозможува рационално размислување.

Оние кои не сакаат да се одвојат од својот удобен кревет, имаат тешкотија при заспивање на друг кревет. Де перницата не е добра, де душекот мек или премногу тврд и неудобен.

И наместо следниот ден да бидеме наспиени, ние со нетрпение ќе чекаме да дојде ноќта за повторно да се испружиме на кревет, ама сигурно не на истиот од претходната вечер.

Да сме тука некаде или на исток, често би се соочувале со доцнење на транспортот. Но, слични ситуации се случуваат насекаде низ Европа. Железнички линии најчесто се соочуваат со тоа. Од дефекти на возови, до протести и самоубиства на шини.

Кога забораваме да си понесеме power bank и кога немаме полнач со нас, може да се најдеме во ситуација кога батеријата на телефонот ќе ни се испразни. Зезнато е ако не знаеме каде точно се наоѓаме, а треба да се вратиме до сместувањето.

Ова се само дел од ситуации кои можат да ни се случат. И верувам дека со најголемиот дел сите се имаме соочено.

Автор: Х. Е. | Црнобело