Шпрепарк – напуштен забавен парк во Берлин со ролеркостери и диносауруси во природна големина

Берлин е преполн со напуштени објекти. Од болници, хотели, казина, па сè до фабрики, станбени згради и забавни паркови. 

Шпрепарк, стациониран во југоисточен Берлин е таков објект, кој е напуштен речиси 20 години. Секој дел од овој забавен парк е исполнет со остатоци од ролеркостери, различни атракции и диносауруси во природна големина.

За првпат овој забавен парк бил отворен во 1969 година од комунистичката влада на Источна Германија и опстојувал до падот на Берлинскиот ѕид, а во 1991 година паркот повторно бил отворен и преименуван во Шпрепарк.

Сопственикот на паркот се впуштил во шверцување на кокаин, па делумно поради неговите криминалистички активности и намалена посетеност, Шпрепарк бил затворен за јавноста во 2002 година.

Со текот на времето, природата го презела целиот парк и на тој начин постои до денес. Многу од атракциите биле уништени во пожарот кој избувнал во 2014 година и од тогаш Град Берлин го презел паркот, поставувајќи обезбедување и кучиња да го чуваат.

Во наредниот период ова место се очекува да се претвори во еден вид на културен и уметнички центар.

До неодамна, влегување во овој напуштен парк претставуваше голем предизвик, знаејќи дека постојано има обезбедување и самиот парк е ограден со висока ограда.

Оние кои веќе го имаат посетено, велат дека преку ден полесно можело да се влезе во паркот и тоа преку дупките кои биле ископани под оградите или со едноставно прекачување на оградата.

Како и да е, во паркот постојано ве демнат очи на обезбедување, па поради тоа мора да се движите тивко и ширум да ги отворите очите.

Во секој случај, посета на Шпрепарк ќе ги задоволи оние кои сакаат адреналински активности. И ќе имаат можност да се прошетаат покрај ролеркостери обраснати со растенија, бротчиња во вид на лебеди, кои гнијат во мочуриште и изгледаат луто, како и исполегнати диносауруси, кои отсликуваат едно заборавено време.

Автор: Х. Е. | Црнобело