Предлог дестинации во Македонија за незаборавни викенд доживувања (за вљубениците во природа)

Каде ќе се патува викендов? Што ќе се прави? Ова се неколку прашања што сите постојано си ги поставуваме. Уште на самиот почеток од работна недела, мозокот почнува да си прави различни експедиции, планирања, пресметки, а истовремено е и во исчекување на стабилно време и пролетни температури. Освен тоа, посветено пребарува и по Фејсбук групи, се консултира со нашите пријатели, бара сугестии од познаници што веќе посетиле некое интересно место што долго време го мерка.

Можеби веќе имате планови, ама ќе ви биде од корист да ги прочитате овие предлози во случај ако сакате негде да заминете од денес за утре. Многу често спонтаните патувања се пропратени со најубавите спомени.

Да, уште не е отворена сезоната за капење. Ќе почекаме уште малку за тоа, ама Отешево е одличен избор кога и да се одлучите да го посетите.

Во минатото, целиот регионот на Преспа ја живеел својата популарност, но иако денес Преспанското Езеро е запоставено, бидете вие што ќе му дадете шанса на ова мирно место за рекреација и ќе ги инспирирате и другите да свратат таму.

Селото Лесново во близина на Пробиштип е интересно место за една попладневна прошетка. Посебно црквата посветена на Архангелите Михаил и Гаврил.

Тоа што не е познато кога точно се изградил манастирот, дали за време на замонашувањето на Гаврил или по неговата смрт го прави местото уште попривлечно.

Исто така, кога веќе ќе стигнете таму, немојте да заборавите да ja истражите Лесновската купа или кратер, како и пештерите настаните од човечка рака каде многу одамна се изработувале воденички камења од вулкански карпи.

Оние на кого историјата им е слаба точка, некој викенд нека тргнат и до античкиот град Баргала, кој се наоѓа на десеттина километри од Штип.

Пред да наминете на штипска пастрмајлија, фрлете поглед на она што е истражено до сега – една десетина од наоѓалиштето. Наодите за локалитетот велат дека Баргала прво бил римски воен логор, а поради добрата местоположба се преобразил во тврдина.

Иако има уште многу да се истражува, сепак со свои очи ќе може да го видите резервоарот за вода, еден дел до градскиот бедем, инфраструктурата на градот како и главната порта.

Ги обожавам водопадите. Додека ги гледам ми даваат еден вид на слобода, ме тераат да се ослободам од сите мисли и да се слеам во сегашниот миг.

Како последен предлог ќе го наведам Копришки водопад, во близина на Демир Капија. Или ако сакате да бидам попрецизен ќе се паркирате кај селото Дрен и од таму ќе тргнете пеш.

Да, имате за одење. Ама природата е прекрасна. Се исплати секој вложен напор за таква глетка што може да ги најдеме само во затскриени локации кај нас.

©CRNOBELO.com Забрането преземање и копирање. Крадењето на авторски текстови е казниво со закон.

Е. Х. | Црнобело