„Зошто детето да го добие презимето на таткото, а не на мајката?“ – Жена поттикна жестока дебата на Твитер

Со објава на Твитер во која им порачува на жените да им го дадат своето моминско, а не татковото презиме на децата, жена од Лондон предизвика жестока дебата. Кој е вашиот став за презимето на детето - дали мора да го наследи татковото или во ред е да го носи и моминското на мајка му?

Ширум светот, норма е детето да го добие презимето на неговиот татко. Според колумна на магазинот Time, оваа традиција ја следат над 95% од хетеросексуалните партнери.

Генерално, родителите одлучуваат чие презиме ќе го носи детето и во повеќето случаи тие се одлучуваат за татковото.

Оваа практика е стара со векови и обично родителите без двоумење го користат презимето на таткото за детето.

Кога ќе се земе предвид дека и повеќето жени го менуваат презимето откако ќе стапат со брак, звучи логично и детето да го носи истото презиме.

Сепак, Британка разгоре жестока дебата на Твитер кога го сподели нејзиното мислење за оваа традиција.

33-годишната Шарлот Праудман е правник од Лондон чиј твит за презимињата на децата стана вирален.

„Порака до бремените жени – ве молам дајте му го на бебето вашето презиме. Вие сте го носеле бебето девет месеци, сте го родиле и ќе бидете одговорни за тоа дете целиот ваш живот.

Кога го регистрирате бебето, запрашајте се – зошто презимето на таткото е поважно од вашето?“

A message to pregnant women — please give the baby your surname.
You carried a baby for 9 months, gave birth, and will be responsible for that child for the rest of your life. When you’re registering the baby ask yourself: why is the father’s surname more important than yours?

— Dr Charlotte Proudman (@DrProudman) August 9, 2023

Во период од една недела, твитот го виделе над 5 милиони корисници и има над 34.000 допаѓања.

Но, мислењето на твитерџиите е поделено.

Некои се согласуваат со ставот на Шарлот и сметаат дека никој не треба да следи традиции ако не сака:

„Јас го направив токму ова“.

„Јас ги имам презимињата на двајцата родители и никогаш не сум ни помислила за ова“.

„Посакувам мајка ми да ми го дала нејзиното презиме. Го мразам сегашното и неговата поврзаност со татко ми“.

„Зависи од луѓето, секоја ситуација е различна. Мислам дека со твитот сака да каже дека ако сте сингл мајка, не треба да се чувствувате обврзани да му го дадете презимето на таткото само затоа што ’отсекогаш било така‘.

Во здрава врска со двајца родители, лесно е да се разговара за презимето на бебето, ако на двајцата им е важно тоа“.

Сепак, некои корисници, вклучувајќи и жени, ја критикуваат:

„Презимето на мајката не е всушност нејзино, туку е на нејзиниот татко. Презимето на таткото си е негово. Сите го наследуваат презимето на татковците“.

„Мажи, ако партнерката му го даде презимето на нејзиниот татко на вашето бебе, тоа бебе автоматски станува негова одговорност. Не трошете ни денар за дете кое го носи вашето презиме“.

„Му покажуваш непочитување на сопругот ако не му го дадеш неговото презиме на детето“.

„Целта е да направите таткото да се чувствува одговорен за детето“.

По бурата реакции, Шарлот сподели уше неколку твитови на темата:

„Тоа што мислите дека жените не ги поседуваат нивните презимиња, дека ги позајмуваат од нивните татковци додека да стапат во брак, покажува дека многу мажи сè уште ги гледаат жените како сопственост на нивните машки роднини, а не автономни луѓе“.

The idea that women don’t own their own surnames, that we are borrowing them from our fathers until we marry just shows that many men still see women as property of their male relatives not autonomous people.

— Dr Charlotte Proudman (@DrProudman) August 12, 2023

„Порака до сите жени – треба да престанеме да кажуваме ’моминско презиме‘. Мажите немаат 'ергенско презиме‘. Тоа е нашето презиме – не на нашите татковци или дедовци“.

A message to all women — we need to stop saying our ‘maiden names’. Men don’t have fatherden names. It’s our name — not our fathers or grandfathers.

— Dr Charlotte Proudman (@DrProudman) August 11, 2023

Што мислите за ставот на Шарлот - дали детето без исклучок треба да го носи презимето на таткото или родителите треба однапред да се договорат?

Спирова С. | Црнобело