5 совети со кои ќе го подобрите односот со свекрвата (и ќе ги избегнете непотребните конфликти)

Договорете се кога е во ред да доаѓа на гости и немојте да се натпреварувате една со друга.

Односот помеѓу снаите и свекрвите може да биде комплициран.

Сепак, вие сте две жени кои можеби немаат ништо заедничко, но одеднаш сте дел од истото семејство.

Во повеќето случаи, со искрен разговор и договор, може да го одржите хармоничниот однос.

Во продоложение, пет совети што ќе ви помогнат во тоа:

Направете план за посета

Нормално е да не сакате некој да доаѓа на гости ненајавен.

Исто нормално е и вашата свекрва да сака да дојде на гости, особено ако имате дете со партнерот.

За да ги избегнете непријатните ситуации, однапред договорете се кои денови сте слободни и во кој период од денот.

Секако, кажете ѝ на свекрвата и дека треба да се најави, во случај да имате неодложна обврска.

Поставете граници уште на почетокот

Сите ние си имаме граници кои не би сакале другите да ги преминат.

Вашата свекрва не може да знае кои се вашите ако не зборувате за тоа.

А, веројатно и таа си има свои граници кои треба да ги почитувате.

Па, уште на почетокот отворено разговарајте за ова и во иднина ќе спречите многу непријатни ситуации.

Не се натпреварувајте една со друга

Вие сте сопруга, а вашата свекрва е мајка на вашиот сопруг.

И, имате потполно различни улоги во неговиот живот и не треба да пробувате да се натпреварувате.

Немојте да пробате да докажете дека вие се грижите подобро за партнерот отколку таа за син ѝ или дека сте подобри од неа во што било. Секако, важи и обратното.

Сега сте дел од истото семејство и треба да соработувате и да си помагате, а не да се гледате како конкуренција.

Не плашете се да кажете „не“

Ова правило не важи само за вашата свекрва, туку за односот со сите луѓе.

Ако не сакате да правите нешто или не ви се допаѓа некој предлог, слободно кажете „не“, дури и ако тоа резултира со мал конфликт.

Во спротивно, само ќе се чувствувате огорчено и со текот на времето дополнително ќе го влошите односот со свекрвата.

Дозволете ѝ да биде баба

Ако сте имале среќа да пораснете со баба, таа сигурно ве разгалувала повеќе од родителите.

Па, дозволете ѝ на свекрвата да му биде баба на вашето дете.

Секако, разговарајте за правилата за воспитување и слично, но не почнувајте конфликт ако некогаш сака да му купи сладолед на детето или посака да го однесе во парк.

Спирова С. | Црнобело