Мајка стана мета на критики: „Моите деца минуваат и 10 часа дневно пред екран – како да имаме бесплатна дадилка“

Мајка од Англија се соочи со критики, откако откри дека им дозволува на децата да користат уреди со екран и по 10 часа дневно. И покрај препораките од експертите, таа смета дека ова не е штетно бидејќи се случувало само неколкупати неделно. Што мислите вие?

Педијатрите и експертите за ментално здравје сè повеќе зборуваат за потенцијалните проблеми кои можат да се јават од често користење уреди со екрани.

Луѓето на секоја возраст можат да почувствуваат последици, но се чини проблемите стануваат најизразени кај децата кои уште се во развој.

И, ова е нешто што им е јасно на родителите, па затоа ставот на мајка од Англија предизвика лавина негативни реакции.

37-годишната Џеј Вајтфилд е мајка на две деца – 7-годишен син и 14-годишна ќерка.

И, вели дека нејзините деца пораснале со уреди, а дневно минуваат и по десет часа пред екран.

Единствено ги терала да ги исклучат уредите половина час пред спиење.

„Ако не можете да си дозволите да плаќате за градинка и дадилки, не знам зошто е проблем да им пуштите телевизија на децата за да завршите обврски низ дома.

Јас отсекогаш сум била опуштена во врска со ова“, вели таа.

Џеј им дозволила на децата да користат таблет на 3-годишна возраст, а смета дека кога немаат обврски, нема причина да им забранува да користат екрани.

„Кога е викенд или распуст, им дозволувам да користат уреди по десет часа дневно.

Нарекувајте ме лоша мајка, но ова е најдобрата одлука што сум ја донела.

Можете да се шегувате на моја сметка колку што сакате, но моите пријателки не ме осудуваат бидејќи, реално, и тие го прават истото“.

Џеј вели дека не сака нејзините деца да следат „режим како во војска“ кога немаат училишни обврски, а и истакнува дека не може постојано да внимава на нив.

„Некогаш одиме во забавни паркови, во зоолошка или на пикник. Но, не сме некои богаташи.

Распустот е долг период за родителите кои не можат да си овозможат дадилки.

А, мајките кои велат дека не им треба време за себе лажат. Замислете си само – неколку часа мир.

Моите деца можат толку да се фокусираат на нивните уреди, што цел ден не ми ни зборуваат. Тоа е благослов“.

Џеј вели дека го користи тој период да одмори, но и да заврши со своите обврски.

„Работам од дома, а кога децата се зафатени со нивните уреди, перам и облека, правам вечера, ја чистам куќата – цел ден работам без некој да ме прекинува“.

Џеј вели дека е свесна за ризиците, но тврди дека нејзините деца не чувствуваат последици.

„Наводно екраните премногу ги стимулираат децата и им го нарушуваат сонот. Моите деца спијат мошне добро.

Сигурно ако се на екран 24/7 ќе чувствуваат последици, но неколку денови неделно сигурно нема да им наштетат.

И, ако се однесуваат добро, зошто да им ги земам уредите? Ги жалам децата кои имаат забрани за екрани“.

Во коментари на социјалните мрежи, Џеј се соочува со критики:

„Можеш да пробаш да си играш со децата и да изградиш врска со нив“.

„Мислам дека десет часа се премногу“.

„Нормално дека на овој начин животот ѝ е полесен бидејќи не мора да мисли на децата“.

„Значи, според тебе, сите доктори и детски психолози грешат?“

Спирова С. | Црнобело