Македонска мајка со порака: „Знам колку е тешко родителството, но на децата не им се потребни екрани за да се смират“

„Сега пред празниците гледам бебиња со екрани по молови додека родителие пазарат... Не осудувам никој, знам колку може тешко и напорно да биде родителувањето некои денови, посебно со две деца“, вели на тема екранизам, Ангела од Скопје, која и самата е мајка на две мали дечиња.

Ангела Костовска од Скопје, која по професија е економист, но и горда мајка на две мали деца, преку својот Инстаграм често споделува свои искуства, но и разменува совети со другите мајки од Македонија.

Овој пат, поттикната од родителите кои за да ги смират своите мали деца, им даваат телефони или таблети, Ангела објави видео, во кое го сподели своето мислење за екранизмот, додавајќи дека не осудува никого, но дека сака да ја крене свеста дека на децата не им се потребни екрани, особено кога се многу многу мали.

Во својата објава на Инстаграм, Ангела напиша:

„Еден потсетник за екраните!

Оваа тема ми беше актуелна и летоска, кога родители шетаа мали бебиња со екран прикачен пред нив, а истото го гледам и сега во празничните денови кога шетаат низ молови за да испазарат или да се видат со пријатели - повторно гледам екрани пред бебиња.

Не осудувам никој, знам колку може тешко и напорно да биде родителувањето некои денови, посебно со две деца.

Но да ја поттикнеме свеста дека на бебиња не им се потребни екрани и кои се последиците од истото.

Ако секогаш посегнуваш по екран кога детето не сака да јаде, да се облече или пресоблече, да спие или едноставно за да завршиш нешто - создаваш зависник.

Последиците се дете кое не соработува секогаш кога нема екран, како и слаба поврзаност помеѓу родителите и децата.

Вака се појавуваат проблеми и на краток рок (како забавен развој во говорот и фокусот), но и на долг рок, односно понатаму проблеми во училиште.

За да го избегнете ова, едуцирајте се на темата деца и екрани и осигурете се дека вие не сте зависник од екрани, бидејќи децата учат од нас“.

Таа сподели уште една порака на самото видео:

„Поради екраните го уништуваш развојот на детето.

Изложеноста на екран кај децата од најрана возраст, особено до третата година, може значително да го наруши развојот на мозокот, когнитивните способности и концентрацијата.

Во првите месеци од животот децата најлесно учат преку сетилата и она што ги опкружува во нивната околина.

Но, ако екранот го одвлекува нивното внимание, овој важен дел од развојот може да се забави.

Дополнително, престимулативната содржина од екраните, создава раздразливи и нетрпеливи деца.

Мојата порака до сите родители е: Одговорноста е ваша! Ограничете ги екраните и овозможете му на вашето дете богатство од искуства во реалниот свет“.

За потсетување, Ангела неодамна воодушеви кога држеше говор на ораторската вечер на Школата за лидерство во Охрид, а притоа во прегратка го држеше својот (тогаш 7-месечен) син.

Погледнете го видеото:

Прочитајте и Инспиративна мајка: Македонка држи говор со 7-месечното бебе - доказ дека жените можат сè

А. Ј. | Црнобело