6 работи што децата секогаш ги забележуваат, дури и ако мислите дека се мали за тоа

Ако кажете шега на сметка на вашето дете, мислејќи дека е безопасна, детето можеби нема да ја разбере, но ќе сфати дека сите му се смеат него. И, ова ќе му ја разниша самодовербата.

Неретко возрасните ги потценуваат децата и мислат дека не забележуваат некои работи.

Но, децата имаат способност да забележуваат детали во однесувањето на луѓето, особено родителите, бидејќи се во фаза на учење и сакаат да ја „впијат“ секоја информација од нивното опкружување.

Шест работи кои вашите деца сигурно ги забележуваат:

Како се однесувате и што мислите за вашиот партнер (или другиот родител)

Иако мислите дека сте биле суптилни кога сте ги „превртеле очите“ кон партнерот, децата ги забележуваат овие работи.

Децата ги забележуваат и критиките и негативните коментари кои му ги упатувате на партнерот, дури и ако пробате да ги кажете саркастично.

Затоа, внимавајте како разговарате со партнерот пред вашите деца бидејќи тие учат од вас.

Како се чувствувате за вашето тело

Ако вие мразите како изгледате, и вашето дете може да има проблеми со самодовербата кога е во прашање неговиот изглед.

Ако вие постојано се жалите дека имате стомаче, целулит или што било, детето ќе почне да се грижи за овие работи и кај себе.

Ниту едно дете нема да се срами за својот изглед, сè додека не слушне дека треба да се срами од своето тело.

Кои се вашите вредности

Децата забележуваат кои се работите што ги вреднувате благодарение на она што го правите и кажувате.

Ако, на пример, му велите на детето дека спортувањето е здраво, а вие не сте воопшто физички активни, нема да успеете да го излажете, бидејќи тоа учи од пример.

Кога сакате да им всадите вредности на вашите деца, секогаш водете со пример.

Како се справувате со вашите грешки и недостатоци

Ако често се критикувате, па и се казнувате кога ќе направите грешка, и вашето дете ќе го прави тоа.

На пример, ако детето извади слаба оценка и вие пробате да го утешите кажувајќи му дека за следниот тест ќе учи повеќе, нема да му помогнете. Детето ќе го гледа вашиот пример и ќе чувствува презир кон себе.

Поради ова, важно е вие да научите да се справувате со вашите грешки и недостатоци на здрав и продуктивен начин, за и вашето дете да го прави истото.

Каков е вашиот однос со храната

Децата секако дека ќе ги стекнат вашите навики за јадење.

Ако се храните нездраво, поверојатно е дека и вашето дете ќе се храни нездраво. Ако си забранувате оброци и сте опседнати со тежината, сосема веројатно е дека и вашето дете ќе го прави ова. Ако ја користите храната за наградување или казнување, и детето ќе го прави тоа.

Пробајте да го подобрите вашиот однос со храната за и вашето дете да стекне добри навики за јадење.

Како зборувате за вашето дете со други возрасни

Можеби мислите дека шегите на сметка на вашето дете се безопасни бидејќи тоа е мало и не разбира. Детето можеби нема да ја сфати шегата, но ќе сфати дека сите му се смеат него и ова ќе му ја разниша самодовербата.

Никогаш немојте да го критикувате детето или да се шегувате на негова сметка пред други луѓе. Дури и кога раскажувате случка, внимавајте кои зборови ќе ги искористите бидејќи децата впиваат сè, а секој збор од родителот има огромно влијание врз нив.

Спирова С. | Црнобело