Како некои деца речиси никогаш не се разболуваат?

Веројатно во ваша околина има барем едно детенце кое како да е имуно на сите болести од неговите врсници. Неговиот нос никогаш не е затнат, а кашлањето  му е непознат поим.

Дали неговите родители знаат нешто што вие не знаете? Веројатно не е некоја тајна, но сепак тие се придржуваат до овие навики кои го чуваат здравјето.

Од денес пробајте и вие, ништо не губите...

1. Редовно миење на рацете

Малите дечиња немаат навика да ги мијат рацете доволно често, но затоа тука сте вие да ги потсетите. Рацете се мијат по секое доаѓање од надвор, пред јадење и по одење во тоалет. Потребни се 15-20 секунди за темелно измивање, така што не брзајте. Одберете некој рефрен кој трае толку долго и заедно пејте го додека ги мачкате рацете со сапуница.

2. Секојдневни активности на отворено

Без разлика колку е студено, стручните лица велат дека секојдневните умерени активности кај децата ги намалуваат шансите од вирози од 25 до 50%. Активностите на отворено се клучни за добра циркулација, па со нејзина помош телото полесно се бори со инфицираните клетки.

3. Доволно сон

Погрижете се децата да не остануваат будни до доцна и да не се будат прерано, затоа што секој недостаток на сон ги зголемува шансите за настинки за цели 50%. На бебињата им требаат 14 часа сон, додека на децата на предучилишна возраст 11 до 13 часа распоредени во текот на денот.

4. Научете ги да не се допираат по лицето

Вирусите најчесто влегуваат во телото преку носот, устата и очите, па затоа научете ги децата да не се допираат по овие делови. Исто така потенцирајте дека чашата, цевката и приборот за јадење никогаш не се дели со други.

5. Хранете ги здраво

Чинијата полна со зеленчук и овошје е уште еден предуслов за силен имунитет и отпорен организам. Бирајте храна богата со витамин Ц како блокула или портокал, и со витамин Д како на пример туна, житарки и полномасно млеко. Испивањето пробиотик, односно јогурт исто така е корисно за одбранбениот механизам на детето.