Работи кои родителите ви ги дозволуваа како дете, а вие му ги забранувате на вашето

Ако се навратите во своето детство, ќе сфатите дека вашите родители ви дозволувале нешта од кои вам ви се крева косата при помислата тоа да го правите со вашето дете.

Во тоа време беа сосема нормални некои појави, на кои денеска би реагирале социјалните служби, вие би биле осудувани од општеството, а соседите би ве пријавиле во полиција.

Потсетете се што правевте вие во детството и дали истите работи би ви било сеедно да ги дозволите сега:

Останувавте сами дома

На осум години веќе бевте доволно возрасни да останете сами дома неколку часа, со едно едноставно упатство - не отворај на никого. Исто така, од училиште си одевте со клуч на вратот, врзан на врвка, стигнувавте дома и чекавте да се вратат родителите од работа.

Излегувавте надвор без родителски надзор

Беше сосема нормално на пет години да трчате низ маалото со поголемите, па и со помалите деца, а играта да трае со часови. Сè што требаше да почитувате беше „не оди подалеку од онаа улица“.

Потоа, од дома ве повикуваа од тераса и вие веднаш се враќавте.

Не носевте шишиња со вода

Пиевте од цревото од дворот на соседите, од маалските чешми или пумпи или влегувавте во продавниците и ја замолувавте продавачката за една чаша вода.

Во краен случај, некој претрчуваше до дома по шише од 2 литра и пиевте неколку деца од него.

Игравте до стемнување, а и потоа

Немавте ни мобилни телефони, ни какво било средство за комуникација. Се знаеше, останувавте надвор до стемнување (поголемите и малку потоа) и се прибиравте на бањање и вечера.

Јадевте сè и сешто

Лижење „степ“, смрзнати лимонади, евтини чоколатца, парче леб со маргарин, сендвич од дома... Не ги дезинфициравте рацете со течност за дезинфекција, едноставно, „билдавте“ имунитет.

Се пушеше насекаде

Во затворена просторија, на отворено, во автомобил, кога има гости, кога нема гости. Буквално секаде.

Не се носеа штитници и кациги

Како би научиле да возите велосипед или ролерки ако не ги „сринете“ колената, макар и по неколкупати истото. Гребаниците и модриците беа сосема нормална работа.

Немаше детски седишта во автомобилите

Некогаш вашите родители ќе ве врзеа со појасите на задното седиште, но имаше и автомобили кај кои воопшто не ни постоеше опцијата појас на задно седиште.

Денеска, поради безбедноста, препорачливо е до одредена возраст да се возат децата во специјални седишта, а потоа врзани врз бампери.

Е. Д. | Црнобело