4 трикови што ќе ви помогнат да ги научите децата секогаш да заспиваат на време

Ако имате деца, веројатно често доживувате фрустрации од типот солзи, бес, тантруми, играње со играчки откако ќе го изгаснете светлото… 

Заспивањето на детето може да го претвори и најмирниот дом во бојно поле. И ова не е само фрустрација - недостатокот на сон кај децата може да резултира со сериозни здравствени последици. Намалувањето на ноќниот сон за само еден час, може да влијае на концентрацијата на вашето дете, односно неговата способност да обрне внимание.

Недоволно сон кај децата, исто така, се поврзува со дијабетес, хипертензија и прекумерна тежина.

Тоа може да доведе до емоционални нарушувања и проблеми во однесувањето слични на оние кај деца со синдром на дефицит внимание и хиперактивност (ADHD).

Сето ова звучи страшно и вие сте свесни за важноста на сонот, но не постои начин да го натерате детето да заспие тогаш кога е време за тоа.

Тогаш, што да направите за да ја добиете оваа борба?

Утврдете ритуали за спиење за секого

Првото нешто што треба да го направите е да се прашате дали имате ноќна рутина. Како изгледа вашиот обид да ги легнете децата в кревет?

Иако секое семејство има свој, посебен ритуал, експертите се согласуваат во едно - на детето треба да му се понуди мала, здрава закуска и топла бања, а потоа да му прочитате смирувачка приказна.

Времето пред телевизорот или друга технологија треба да се сведе на нула најмалку еден час пред спиење.

Јадете храна што го помага сонот

Исхрана е следниот дел од загатката за цврст и мирен сон. Она што вие и вашите деца јадете во текот на денот - не само за вечера - може да има големо влијание врз ноќниот сон.

Добрите протеини и здрави масти во оброците помагаат да се балансира шеќерот во крвта, а со балансирање на шеќерот во крвта ќе се балансира кортизолот, кој е стрес хормон.

Ако кортизолот се покачи во текот на вечерта, на децата им станува тешко да заспијат.

За да се одржи рамнотежата во текот на спиењето, шеќерот во крвта и кортизолот бараат исхрана со многу свежо овошје, зелен лиснат зеленчук и протеини како грав и мешунки.

Здравите масти од ореви, семиња, маслиново масло и авокадо исто така се важен дел од исхраната која го помага сонот.

Подгответе се за стресот поради враќање на училиште

Исхраната не е единственото нешто што влијае на нивото на кортизол. Надворешните стресови се исто така виновни, а тоа најмногу се чувствува при преминот лето - есен.

За многу семејства, септември ја навестува бурната нова реалност: училиште, градинка, па и вашето порано станување за на работа. Сиот тој стрес и вознемиреност може да влијае на детскиот сон.

Имајте активна, отворена комуникација со своите деца за се што може да ги мачи.

Вежбањето наутро или попладне, a не подоцна во текот на ноќта, е навистина важно за да се балансираат различни хормони во нервниот систем.

Тоа ќе помогне во релаксација подоцна во текот на ноќта.

Пронајдете го вашиот начин

Секој родител знае што е најдобро за неговото дете - само вие може да создадете рутина што ќе функционира.

Вметнете растителни чаеви во дневното мени на детето - камилицата е одамна позната по своите смирувачки својства.

Чекор понатаму е магнезиумот, кој е нежен и релаксирачки за нервниот систем и генерално безбеден за децата.

За какви било витамински додатоци во исхраната консултирајте се со вашиот матичен лекар или педијатар.

А. Ш. | Црнобело