Отстапки во развојот на вашето дете: Зошто е важна раната интервенција?

Развојот на секое дете зависи од самото дете. Секое дете се развива на свој единствен и карактеристичен за него начин.

Од една страна имаме деца кои рано почнале со џвакање на храната, рано прооделе и прозбореле, се стекнале со разни вештини, додека од другата страна ги имаме дечињата кај кои овој развоен процес е одложен.

Родителот е тој кој прв ги забележува отстапувањата кај своето дете. Ако забележите било какви развојни отстапувања кај Вашето дете, потребно е да се обратите кај неговиот педијатар, логопед, дефектолог, итн.

Раната интервенција опфаќа интервенција кај дечиња помали од 3 години. Периодот во кој мозочето е нај “пластично”, односно време во кое мозокот најлесно се адаптира на промени.

Раната интервенција е индивидуална за секое дете и семејство, и пристапот зависи од потребите на детето и приоритетите на семејството.

Она што е важно да се знае, е дека колку порано се отпочне со стручна помош, толку подобро.

Доколку забележите отстапувања кај детето во:

- Когнитивниот развој

- Говорниот развој

- Социо – емотивниот развој

- Моторичкиот развој

- Сензорните вештини

Обратете се кај педијатарот на детето, потоа консултирајте се со некој специјалист во областа од која Ви е потребна помош.

Порано се сметаше дека е нормално децата да не зборуваат до 3 – тата или 4 – тата година од животот, па родителите го прескокнуваа оној значаен развоен период и пластичност на мозокот на детето за постигнување на посакуваните резултати и достигнување на нивото на врсниците.

Денес е поинаку, ние терапевтите инсистираме на тоа навремено да се детектираат доцнењата во развојот на вештините кај децата, како би можело навремено да се отпочне со соодветен пристап од стручни лица.

Не чекајте, реагирајте!

Логопедот Симона Василеска Николовска може да ја следите и контактирате на Инстаграм. 

Прочитајте и: До која возраст детето треба да знае да ги каже гласовите „Р“ и „Л“?

©CRNOBELO.com Забрането преземање и копирање. Крадењето на авторски текстови е казниво со закон.