„Зајче без опавче“, „Роденден“ – Со стиховите на Васил Куноски растевме ние, а растат и нашите деца

БЕГАЈ, ЕЛЕНЧЕ

Бегај, бегај, еленче,
ловецот е тука,
на тебе нанишанил,
на тебе ќе пуќа.

Скриј се, скриј се в грмушка,
не мрдај и ќути,
тебе тој не те гледа,
затоа се лути.

Дома ќе си отиде
невесел и тажен -
само друг пат, еленчо,
не прави се важен.

ШТУРЧО

За на свадба штурче
добило покана:
- Ај, штурче, да свириш -
свадбари те канат.

- Би дошло - им рекло
- ама ми е срам,
зашто на тамбурава
една песна знам.

Штур-штур пеам,
пеам секој час,
и дење и ноќе
сѐ на еден глас.

ЈУНАЧЕ

Јорданчо од градинка
штом се вратил денес,
нема рече никаде
појунак од мене!

Знаете ли што било,
Јорданчо е прав,
вели дека изел сам
за два-тројца грав!

АЈ, НА ЗДРАВЈЕ

Настина Тина,
носе ѝ цеди,
што ли да прави,
што ли да реди?

Апче, лекче,
малку млекце,
или канче
топло чајче
- рече мајче.

Кивна Тина,
ај на здравје,
на настинката
- ај со здравје!

ЧУДЕН ВАСЕ

Васе ги распознава
скоро сите возила,
кога ќе ги зареди,
како да ги прозива.

- Еве фиќо, стојадин,
шкода, лада, југо,
кога е на улица,
не гледа во друго.

Но во тоа знаење,
има една мана,
уште не разликува.
спачек од дијана.

НЕСРЕЌА

Ало, амбуланта,
овдека е Дара,
несреќа се случи,
брза помош барам.

Куклето ми падна,
рачето го чукна,
ножето го скрши,
главата му пукна.

Ало, амбуланта,
лекар да се прати,
ако треба пари,
тате ќе му плати.

Б. С. Б. | Црнобело