Совети и трикови кои треба да ги знаете ако сакате вашата зимска свадба да биде совршена

Иако можеби не се толку популарни како пролетните, сепак и зимските свадби можат да бидат магични и романтични.

Но, важно е да се погрижите за неколку работи со цел да заблескате вие, како и атмосферата на вашиот ден во зимските денови.

Не паничете, сите проблеми имаат решение и постои начин да се избегнат несакани ситуации.

Следниве трикови и совети ќе ви помогнат да бидете сигурни дека вашата зимска свадба ќе биде волшебна:

За стилот

Инвестирајте во зимски додатоци

Не дозволувајте ладното време да ви го уништи денот и обезбедете си дополнителни стилски додатоци кои ќе ве топлат. Крзно, вел, наметка и сл.

Плус, погрижете се и најдете некој кој ќе биде задолжен за вашите наметки за да знаете дека секогаш се до вас и на сигурно.

Топол и шик блејзер за мажите

Доколку младоженецот сака да си поигра со стилот, кадифените блејзери се идеални за ладните денови, но може да се најде и друга замена, важно е двајцата да бидат стоплени.

Не заборавајте на третмани за убавина

Испукани усни и сува кожа се нешто сосема нормално во зима, но тоа не ви е потребно на денот на свадбата. Па, уште пред свадбата, постојано грижете се за вашето лице, користете средства за убавина, омекнување на кожата и навлажнување.

Под венчаницата

Секако, венчаницата е она што сите ќе го гледаат на вас, никој не гледа што носите одоздола, па не заборавајте да облечете пар тесни и топли хулахопки.

Стилски зимски чевли

И чизмите можат да бидат шик ако го одберете вистинскиот модел.

Нека има светки

Бидете во центарот на вниманието додавајќи светки во вашиот изглед – дел од фустанот, накитот, наметката или додатоци во косата – изборот е ваш.

Не заборавајте и на пријателките

Како на вас, така и на останатите девојки ќе им биде ладно во зимските денови, посебно ако свадбата е традиционална и трае цел ден. Потсетете ги сите да имаат нешто за облекување за да може сите да уживаат во денот, наместо да мрзнат.

За местото

Плус време за пат

Колку и да не сакате, сепак мора да размислувате и на лошото време, а тоа значи и лош сообраќај, па не ги планирајте работите до минута и оставете простор и за случајности.

Сè на едно место

Ова е одлично за свадбите во било кој период, но во зимските денови кога е ладно, а можеби и врнежливо или снежно, многу е подобро да не мора да ги влечете сите гости, како и вие, на повеќе места.

Па, наместо да одите во матично, црква и ресторан посебно, направете ја церемонијата во црква во посебен ден, а матичарот организирајте да дојде во ресторанот каде ќе биде прославата – ќе биде многу подобро за сите.

Романтична атмосфера со свеќи и шишарки

Денот секако може да се погоди тмурен, па осветлете го со романтични светла и свеќи во просторот каде ќе биде прославата, односно на масите.

Зимски свадбени бои

Декорирајте го местото со топли тонови на јагода боја, бургунди, црна и златна. Додадете зимска романтика со природно зеленило и светли тонови.

За фотографии

Сè е во тајмингот

Во зимскиот период рано се стемнува, па доколку сакате и фотки на природна светлина, направете ја фотосесијата малку порано. Разговарајте за ова однапред и со фотографот, кој секако би требало да знае за ова и за подесувањето на апаратот за фотките дури и кога ќе се стемни да изгледаат совршено.

Чадори за секој случај

Обезбедете си убави чадори кои ќе ви одговараат со стајлингот за фотографии надвор во случај на дожд или уште подобро – снег.

Не ги уништувајте чевлите

Ако сакате да имате фотосесија надвор, погрижете се да имате барем уште еден пар чевли, бидејќи сигурно нема да сакате да стапнете во кал, па потоа да се шетате низ ресторанот така.

Ракавици

Смрзнатите рае не изгледаат воопшто симпатично на фотографиите, па потрудете се да си обезбедите фини ракавици со кои ќе изгледате елегантно и стоплено.

М. М. | Црнобело