Активни состојки во продукти за кожа кои се идеални за зима (ја штитат од сушење и загаден воздух)

Витаминот Ц е идеален за зимските денови бидејќи ја штити кожата од загадувањето, но и УВ зраците. Навечер, пак, користете ретинол кој го изедначува тенот.

Негата на кожата во зима е особено важна бидејќи овој период од годината таа е посклона на сушење и е изложена на поголемо загадување на воздухот.

Главно продуктите што ги користите во лето можете да ги користите и во зима.

Но, ако избегнувате да користите многу продукти, можеби треба да вметнете нешто плус, барем во зима.

Активни состојки што треба да ги барате во продуктите за зимска нега на кожа:

AHA

Кратенката AHA се однесува на овошни киселини кои помагаат во отстранувањето на мртвите кожни клетки, односно ѝ прават пилинг на кожата.

Погодни се за сува кожа – нешто што е честа појава во зима.

Важно е да знаете дека продуктите со АНА треба да се користат една-двапати неделно бидејќи можат да направат иритација.

Исто така, ја прават кожата почувствителна на светлина, па препорачливо е да ги користите навечер.

Ако, пак, имате многу чувствителна кожа, најдобро е да ги прескокнете овие продукти за да не си ја влошите состојбата.

BHA

Уште една група киселини кои се користат за пилинг на кожата.

Имаат сличен ефект како AHA киселините, а можат да бидат од помош и кај кожа склона кон акни.

Обично AHA и ВНА киселините се продаваат во ист продукт и важат истите правила за употреба – најмногу двапати неделно, и само навечер.

Важно е да се напомни дека не треба да се комбинираат со ретинол.

Хијалуронска киселина

Хијалуронската киселина ја навлажнува кожата, особено во зимскиот период кога е склона кон сушење.

Исто така, создава и заштитен слој.

Погодна е за секаков тип кожа, особено за зрела бидејќи дополнително ја хидрира.

Нијацинамид

Нијацинамидот е всушност витамин Б3 и докажано го изедначува тенот, но и ги измазнува малите брчки.

Ја хидрира кожата и ја штити, што го прави одличен за зимските месеци.

Погоден е за секаков тип кожа, а во комбинација со витамин Ц, може да ги намали дамките на кожата кои се јавуваат со стареењето.

Важно е откако ќе нанесете серум или друг продукт со нијацинамид, да ставите и крем со фактор.

Ретинол

Ретинолот го стимулира производството на еластин и колаген, со што ги намалува брчките.

Исто така, ја осветлува кожата и го изедначува тенот.

Погоден е за скоро сите типови кожа, но не е препорачлив ако имате многу чувствителна.

Ретинолот не треба да се меша со АНА и ВНА киселини, ниту со витамин Ц бидејќи може многу да ја исуши кожата.

Односно, почекајте барем 20-тина минути за ретинолот добро да се впие, пред да ставите некој од овие продукти.

Препорачливо е да го користите кога е темно, бидејќи ја прави кожата почувствителна на сонце.

Витамин Ц

Витаминот Ц е одличен за зимскиот период бидејќи ја штити кожата од оштетување, но и од УВ зраците и загадувањето на воздухот.

Најдобро е да го користите наутро, а погоден е за сите типови кожа.

Спирова С. | Црнобело