Грешки што ја оштетуваат кожата на лицето, а ги правиме сите

Многу често миење, грубо бришење со крпа, стискање мозолчиња – некои работи што ги правиме сите имаат навистина лошо влијание врз кожата на лицето.

Не е важно дали ги користите најскапите и најквалитетните продукти за нега на лице бидејќи ако имате некои лоши навики, ништо нема да ви биде од помош.

Неколку грешки што ги правиме сите, а ја оштетуваат кожата на лицето:

Многу често миење

Пречестото миење на лицето, особено со продукти, ја отстранува природната заштита на кожата, па ја прави посклона кон сушење и иритација.

Мијте го лицето двапати дневно, со нежен продукт, соодветен за вашиот тип кожа. По миењето, задолжително нанесете хидратантен крем.

Грубо бришење со крпа

Триењето со крпа ја растегнува и оштетува кожата што, пак, може да биде причина за рана појава на брчки.

Лицето секогаш бришете го со мека крпа, со тапкање – никако со триење.

Стискање мозолчиња

Никако не треба да ги стискате мозолчињата и акните бидејќи ќе ја иритирате кожата, а и ризикувате да ви останат лузни.

Ако имате проблематична кожа, користете соодветни продукти, а можете да се консултирате и со дерматолог за дополнителен третман.

Туширање со жешка вода

Жешката вода ги отстранува маслата кои се како природна заштита на кожата, па ја прави сува и иритирана.

Најдобро да се туширате со млака вода, а по туширањето секогаш да ставите и лосион за тело.

Често користење пилинзи

Пилингот ги отстранува мртвите кожи клетки и ја прави кожата помека и помазна. Но, ако претерувате, ќе ја иритирате кожата, ќе си создадете црвенило и, генерално, ќе ја направите почувствителна.

Не треба да правите пилинг почесто од двапати неделно, а ако имате проблематична кожа, избегнувајте ги пилинзите со гранули.

Допирање на лицето

Без разлика колку често ги миете рацете, на нив сепак лесно завршуваат бактерии. Па, кога ќе го допрете и лицето, овие бактерии ќе завршат на кожата и може да ви создадат низа проблеми.

Затоа, избегнувајте да го допирате лицето.

Користење валкани четки за шминкање

Додека се шминкате, на четките остануваат и дел од бактериите и мастите на кожата. Ако ги користите без да ги измиете, во комбинација со шминката, може да ви предизвикаат иритација, појава на мозолчиња и други кожни проблеми.

Важно е да ги миете четките барем двапати неделно, а најдобро по секое користење.

Спирова С. | Црнобело