Кои се природните тајни за убавина на Турчинките?

Турчинките се познати како жени кои обожаваат тешка, нагласена шминка, особено на очите, но и жени кои прават третмани за убавина со природни производи. Кои се тие?

Жените во Турција често се поврзуваат со тешка шминка и впечатлив изглед, но факт е дека тие преферираат природната нега на кожата, како што тоа го правеле жените многу генерации пред нив.

Често одат во амам (турска бања) и се подложуваат на ритуали за убавина засновани на докажани, природни рецепти.

И иако естетската медицина во земјата одамна е во подем, докажаните, природни препарати за убавина остануваат популарни.

Кои природни производи се дел од ритуалите за убавина на Турчинките?

Маслиново масло

Турчинките го обожаваат маслиновото масло, кое не е само состојка во нивната исхрана, туку и козметички производ.

Тие го користат за нега на тело и лице.

Маслиновото масло (особено екстра девственото) делува како природен, високо хранлив хидратант за кожата.

Содржи витамини А, Д, Е и К, како и бројни антиоксиданси, кои помагаат за длабинска хидратација на кожата, измазнување на брчките и смирување на иритациите.

Ова особено го користат жените кои имаат сува, зрела и многу чувствителна кожа, а го нанесуваат во мали количини.

Турски јогурт

Турскиот јогурт ги заменува маските за лице.

Тој во себе содржи хранливи состојки што ја смируваат кожата, го намалуваат црвенилото, а го подобрува и тенот.

Се нанесува на лицето, во подебел слој и се остава да се исуши, па лицето се мие со млака вода, а на крајот се става хидратантна крема.

Пилингот е задолжителен

Турчинките редовно прават ексфолијација на лицето и телото (дома или во салон за убавина), која помага во ослободување на кожата од токсини и мртви клетки, ја подобрува циркулацијата и ѝ дава здрав тен.

Пилингот може да е направен дома, а една варијанта е шеќер помешан со мед, кој се меша и потоа се трие врз телото или лицето.   

Вода од роза

Турчинките сметаат дека а вода од роза игра клучна улога за убавината.

Тие ја користат како природен тоник што хидрира, ги смирува иритациите и го враќа сјајот на кожата или како освежителен спреј.

Розовата вода има и други бројни ефекти врз кожата - тонира, го намалува црвенилото, лечи акни, го регулира лачењето на себум, ја враќа природната pH вредност, го забавува процесот на стареење и слично.

Ова е одличен избор ако имате сува и зрела кожа.

Но, водата од роза е многу нежна, па и жените со исклучително чувствителна кожа можат безбедно да ја користат.

А. Ј. | Црнобело