Трикови за убавина: Како шминката да изгледа совршено 24 часа

Ако сте поканети на свадба која трае цел ден или на некоја друга прослава, тогаш сигурно сакате шминката да ви изгледа совршено во текот на целиот ден. Сега, тоа е возможно благодарение на овие мејкап трикови.

Карминот и сјајот за кратко време ги снемува и се разлeваат во ситните брчки околу устата, маскарата станува сува и се рони, ајлајнерот се размачкува и како што поминува времето нашето лице започнува да изгледа лошо.

За да изгледате совршено подолго време, искористете ги овие трикови:

1. Ако имате мрсна кожа, тогаш 2-3 пати во текот на денот отстранувајте ја маснотијата со посебни силиконски марамчиња, кои ги има во добро снабдените маркети за козметика. Така, шминката ќе ви остане на место, кожата сува и нема да мора одново да нанесувате пудра.

2. Доколку имате сува кожа, тогаш треба да го правите спротивното, односно да ја хидрирате кожата со термална вода исто така 2-3 пати дневно. Доколку е потребно, во текот на денот додајте малку пудра.

3. На центарот на лицето додајте светлина, со тоа што ќе си понесете со себе коректор кој е за нијанса посветол од вашиот тен и нанесете го на Т-зоната. Доколку го поправате руменилото, бидете внимателни, бидејќи кожата мора да ви биде сува за да не создадете дамки. Сенката која се собрала на капакот, со домалиот прст тапкајте ја додека да добиете изедначена текстура. Потоа, на капакот натапкајте малку камена пудра и повторно нанесете сенка.

4. Кога станува збор за маскарата, никогаш не нанесувајте ја повторно во текот на денот, бидејќи само ќе добиете дебели трепки кои ќе направат лицето да ви изгледа уморно. За да го поправите карминот, прво целосно избришете го, а потоа на усните нанесете балсам и намачкајте кармин.