Есенски трендови за фарбање на косата

Кога е во прашање грижата за вашата убавина, секогаш имаме како да ви помогнеме.

Дали се работи за нега на лице, тело, или како во случајов - фризура, можете да најдете многу идеи.

Од темни бои, преку бакарни нијанси, па сѐ до руси и карамела боја прамени – изборот е голем доколку сакате да бидете во тренд оваа есен.

Одберете кој тренд најмногу ви одговара и направете стилска промена, а изгледот на славните дами ќе ви помогне во изборот:

Повторно во фокус црни нијанси

Оваа есен можете да одберете целосно црна коса која најдобро стои на кратка боб фризура, а доколку пак сакате нешто поразиграно и коса со средна должина, на црната боја додадете костенливи прамени кои ќе го дефинираат изгледот.

Бронде техниката сѐ уште актуелна

Бронде техниката на сенчање на косата се појави по омбрето и стана голем хит помеѓу познатите дами, а очигледно е повторно во тренд.

Доколку не можете да се одлучите за бринета или блондинка, оваа техника е идеална за вас. Можете на темна основа да ставите посветли прамени или пак доколку сакате посветла варијанта, можете да се одлучите за златното бронде.

Бакарни нијанси создадени за есен

Есента не може да помине без бакарните тонови кои одлично стојат и на дами со темен и со светол тен.

За оние похрабрите, кратката коса и темниот тен се одлична комбинација за бакарна боја, а секако, секогаш ви стои како опција и целосно фарбаната коса со сјај во боја на оган.

Контраст на коренот и остатокот на косата

Ваквиот ефект може да се постигне со многу различни техники, но можете да го постигнете и на наједноставниот начин – пуштете ја косата да порасне без да го фарбате коренот.

Ќе добиете природен и атрактивен изглед, кој секако може да го зачините со уште една нијанса која фризерот ќе ви ја предложи.

Прамени со боја на карамела

Прамените секогаш дополнително ја освежуваат фризурата и и даваат посебен сјај, а доколку имате темна коса и не сакате премногу да ја промените, најдобро е да направите прамени со боја на карамела.

Оваа фризура стои на рамна и на виткана коса, а ќе добиете совршен есенски изглед.

Чоколадна нијанса

Коса целосно исфарбана во боја на чоколадо е секогаш вистински погодок со кој не може да погрешите. Чоколадната боја може да се освежи и со прамени во боја на цимет со што косата ќе добие посебен есенски сјај.

Платинеста коса – без грешка

Овде не може многу да погрешите, а ако мислите дека русата коса веќе не е во мода, се лажете – секогаш била и ќе остане.

Целосно кратка коса или средна должина се идеални фризури за русите девојки оваа есен, но секако, изгледот е проверен и докажан и за оние со подолга коса.

М. М. | Црнобело