Три маски за очи што можете да ги направите и сами

Во текот на потоплите месеци, особено важно е да ја хидрирате кожата околу вашите очи.

Покрај хидратантните креми, за оваа цел доста ефикасни се и маските за очи, кои можат и да ги намалат брчките во областа и да ја намалат видливоста на подочниците.

Уште подобро е што нема потреба да давате многу пари – можете и сами да си направите маска за очи, со продукти што сигурно ги имате дома.

Во продолжение погледнете три „рецепти“ за домашна маска за очи:

Маска од роза и краставица

Поради својот состав, краставицата ја затегнува и смирува кожата.

За да ја направите маската, во блендер измешајте половина краставица и 30 ml вода од роза.

Земете памук и исечете ги во форма на полу-месечина. Накиснете ги во смесата и оставете ги 10-тина минути. Потоа поставете ги тупферите под очите, оставете да делуваат 10 минути и исплакнете со вода.

Маска од кафе, белки и мед

Кафето, во комбинација со витамините и протеините во јајцето, ќе ја затегне вашата кожа. Медот, пак, има антиоксидансни својства и ќе ја тонира кожата.

Во сад измешајте белка од едно јајце, една лажица кафе и една лажица мед. Мешајте ја смесата околу една минута.

Со чисти раце или со четка нанесете ја смесата околу очите и оставете ја да делува 10 минути.

Отстранете ја маската со вода, а потоа нанесете хидратантна крема.

Маска од камилица

Ова е наједноставната маска што можете да ја направите. Во врела вода ставете две вреќички чај од камилица, а потоа оставете ги да се изладат на собна температура.

Потоа ставете ги вреќичките врз затворени очи и оставете да делуваат 15 минути.

На крај, само нанесете хидратантна крема.

Спирова С. | Црнобело