Зошто третманот за лице со пареа треба да стане дел од вашата рутина?

Постојат безброј фактори што придонесуваат за појава на проблеми со кожата – начинот на исхрана, хормонална нерамнотежа, но и надворешните влијанија како сонце и загаден воздух.

Ако имате проблематична кожа, досега сигурно сте пробале безброј продукти и третмани. А, голема е веројатноста да сте слушнале и за третманот за лице со пареа.

Изгледа дека овој едноставен и евтин третман, што можете да го направите и дома, е одличен за чистење и смирување на кожата на лицето.

Во продолжение, пак, погледнете неколку причини зошто да му дадете шанса:

Отстранување на нечистотиите и продуктите од кожата на лицето

Покрај мастите што ги лачи самата кожа, на вашето лице има остатоци од продуктите што ги користите, како креми и шминка, но и честички од загадениот воздух.

Третманот со пареа е одличен начин да ги отстраните сите овие нечистотии од лицето.

Отстранување бактерии и мртви клетки кои можат да бидат причина за акни

Бидејќи кожата постојано се регенерира, на неа остануваат и многу мртви кожни клетки. Истовремено, на лицето се наоѓаат и многу бактерии, кои можат да бидат причина за појава на акни.

Третманот со пареа ќе ви помогне да ги отстраните и нив.

Повеќе кислород за лицето

Со овој третман се прошируваат крвните садови, а со тоа кожата се снабдува со повеќе кислород. Затоа и лицето изгледа малку поцрвено откако ќе се тргнете од пареата.

Сепак, ако забележите премногу црвенило за време на третманот, најдобро би било да не го практикувате поради можна иритација на кожата.

Намалена појава на брчки

Ако не сакате да купувате скапи продукти против брчки, тогаш третманот со пареа може да биде одлична алтернатива.

Бидејќи третманот ја подобрува циркулацијата, го поттикнува и лачењето на колаген и еластин, кои ја прават кожата поеластична и ја намалуваат видливоста на брчките.

Природна хидратација на кожата на лицето

Третманот со пареа ја хидрира кожата, па е одличен ако имате проблем со премногу сува кожа.

Подобро апсорбирање на продуктите за нега на кожа

Бидејќи третманот со пареа темелно го чисти вашето лице, кожата подобро ќе ги апсорбира кремите и другите продукти што ќе ги нанесете на неа.

Можеби само третманот со пареа не е доволно за да имате совршена кожа, но дефинитивно би требало да биде важен дел од вашата рутина.

Сепак, како што напоменавме, ако забележите црвенило или каква било иритација, најдобро најдете друг третман.

Спирова С. | Црнобело