5 најчести грешки кои ги прават Македонките при шминкање, открива стилистот Небојша Пешевски

Грешка: Повеќеслојна закоравена маскара. Грешка: Претерано темно исцртани веѓи.

Небојша Пешевски години наназад работи како шминкер. Тој прави неверојатни трансформации и знае како на вистински начин да ја истакне убавината на жените.

Фото: Фејсбук Небојша Пешевски

За CRNOBELO.com тој открива кои се најчестите грешки при шминкањето кои ги прават девојките и жените во Македонија:

Ставање руменило и хајлајтер

Руменилото може симпатично да изгледа и да го даде оној убав природен младолик сјај на тенот. Голем проблем кај многу жени е што претеруваат со руменилото и тоа прави да изгледаат како „кловнови“.

Оваа грешка може да се појави во два облика.

Првото е прекумерно нанесување на руменило на јаболчниците со создавање на флеки, а друго е ставање руменило од устата, па до увото што изгледа како некоја патека за пешачење.

Овој проблем може да се реши со „блендање“ на руменилото каде што ќе ги ублажите оние нагласени пресеци.

Прецртување на усни

Прецртани и нагласени усни со темно моливче се честа грешка во шминкањето.

Девојките патат од комплекс на мали усни и често можеме да сретнеме девојки со прецртани усни. Уште полоша варијанта е кога станува збор за дневна шминка.

Темно исцртани веѓи

Темните веѓи не излегуваат од мода, но лесно може да се случи тие да бидат пренагласени.

Веѓите претставуваат рамка на вашето лице. Затоа немојте да го уништувате вашето лице самите. Претерано темни веѓи е навистина честа грешка која ја прават девојките.

Доколку имате темна коса, препорачливо е да изберете една нијанса посветла нијанса за да ги исцртате вашите веѓи.

Доколку имате светла коса доста важно е да не креирате видлива впечатлива линија. Напротив тоа треба да биде нежно, незабележително, односно само дискретно нагласено.

Бирање погрешна пудра

Можеме да сретнеме девојки кои сакајќи да го постигнат оној ефект на исончан тен најчесто користат пудра доста потемна од својот тен, што е навистина погрешно.

Ставање премногу слоеви на маскара

Ставањето на многу маскара може да изгледа навистина непријатно. Мора да кажете стоп за повеќеслојната закоравена маскара.

С. С. | Црнобело / Фото: depositphotos.com