Зошто никако не треба да го користите Оземпик за слабеење - лекот за дијабетес што е хит кај холивудските ѕвезди?

Зошто никако не смеете да го користите Оземпик за слабеење?

Најпрво, Оземпик не е одобрен за слабеење. Покрај тоа, ако почнете да пиете какви било лекови за слабеење, вашиот организам може да се навикне на нив и да предизвикате низа проблеми со здравјето.

Според соопштението на МАЛМЕД, лекот предизвикува и низа несакани ефекти:

„Агенцијата за лекови и медицински средства сака да апелира дека лекот Оземпик е регистриран исклучиво за третман на возрасни пациенти со дијабетес тип 2, кој се издава само на лекарски рецепт…

Како и за секој друг лек, и за лекот Оземпик постојат контраиндикации, односно состојби во кои лекот не смее да се применува, а евидентирани се и несакани реакции…“

Од МАЛМЕД апелираат и дека на пазарот во Македонија се продава и фалсификат на лекот од кој не можете да знаете со какви последици ќе се соочите.

И на официјалниот веб-сајт на лекот е истакнато дека Оземпик не е лек за слабеење.

Кои се несаканите ефекти од лекот?

Доколку сето ова не е доволно да ве одврати од намерата да го пробате лекот, тогаш треба да се запознаете со несаканите ефекти.

На официјалниот веб-сајт, како и во соопштението на МАЛМЕД, се наведени следниве несакани ефекти:

• гадење
• болка во стомакот
• констипација
• дијареја
• повраќање
• нарушување на метаболизмот

Во некои случаи, лекот може да предизвика и хипогликемија, односно многу ниско ниво на шеќер во крвта.

Оваа појава е проследена со симптоми како:

• студена пот
• бледа кожа
• главоболка
• гадење
• забрзано чукање на срцето
• анксиозност
• тресење

Исто така, некои луѓе се алергични на активната состојба семаглутид, а тоа може да им создаде дополнителни проблеми.

Што значи, освен ако немате дијабетес тип 2 и вашиот лекар не ви го препишал лекот, не ризикувајте да го користите за слабеење.

Спирова С. | Црнобело