Девет „безопасни“ ноќни навики што ве држат будни навечер

Останувате будни до доцна, читате вести со негативна содржина и трагедии и ја користите спалната соба како канцеларија.

Доколку ви е тешко да заспиете навечер, без разлика колку сте уморни, можеби треба да промените некои навики.

Ако ова ви претставува сериозен проблем кој никако не можете да го решите, тогаш препорачливо е да се консултирате со експерт.

Во меѓувреме, погледнете и кои се лошите навики што ве држат будни навечер:

Останувате будни до доцна

Кога цел ден сте зафатени, нормално е навечер да сакате да го жртвувате сонот за да имате малку повеќе време за себе.

Многумина го одолговлекуваат легнувањето за да ги завршат обврските низ дома, да го испланираат следниот ден или само да изгледаат филм или серија.

Проблемот е тоа што ако го правите ова често, вашиот мозок е многу активен, па ќе ви биде тешко да заспиете, без разлика што сте изморени.

Во ред е некогаш да останете будни и до подоцна, но потрудете се секоја вечер да си легнувате во исто време и да спиете барем 6-7 часа.

Пиете алкохол пред спиење

Можеби ви изгледа како чашата вино навечер да ви помага да заспиете.

Но, алкохолот може и да ве држи будни.

А, дури и да заспиете, штом сте пиеле алкохол, поверојатно е да се будите во текот на ноќта и главно да ви се намали квалитетот на сонот.

Најдобро е да не пиете алкохол барем два-три часа пред спиење.

Минувате време пред екран

Факт е дека скоро сите сме навикнати да „висиме“ на телефон или пред телевизор пред да си легнеме.

Но, синото светло што го емитуваат екраните може да го наруши квалитетот на сонот.

Ако, пак, пуштите серија, секогаш постои можност да не можете да престанете да гледате, па да изгубите и неколку часови од времето за спиење.

Затоа, пред спиење, најдобро е да се посветите на активност која не вклучува екрани, а ве релаксира, како читање или медитација.

Читате негативни вести

Ако сепак не можете да се одделите од телефонот навечер, тогаш обрнете внимание на содржината што ја гледате.

Ако пред спиење се изначитате негативни вест за проблемите во светот, секако дека ќе ви биде потешко да заспиете.

Вежбате навечер

Најдобро да избегнувате интензивни тренинзи барем два часа пред спиење.

Многу луѓе вежбаат доцна навечер бидејќи мислат дека тоа ќе ги измори и полесно ќе заспијат.

Но, по вежбање може да чувствувате болка во мускулите, но и да имате повеќе енергија што, пак, ќе ви го отежне заспивањето.

Ако сакате да вежбате навечер, тогаш држете се до полесни вежби, како јога и пилатес, а не кардиовежби или кревање тегови.

Немате рутина за релаксација

Пробајте да вметнете време за релаксација барем половина час пред спиење.

Направете си чај, прочитајте некоја страница од омилената книга, медитирајте. Генерално, одвојте време за вистински да се релаксирате и ќе заспиете многу полесно

Јадете храна со многу шеќери

Кога јадете храна со многу шеќери, се зголемува и нивото на шеќер во крвта. Ова, пак, ви дава наплив на енергија и нормално дека ќе ви биде тешко да заспиете.

Ако ви се јаде пред спиење, држете се до храна со ниско ниво на шеќер, како овес или зеленчук.

Спиете во многу топла соба

Во студените месеци, сите сакаме да си легнеме во топла соба.

Но, ако температурата е многу висока, ќе ви биде тешко да заспиете или ќе се будите во текот на ноќта.

Идеално е температурата во спалната да не биде повисока од 19 степени Целзиусови, а ако ви е студено, подобро покријте се со подебел прекривач.

Ја користите спалната како канцеларија

Ако навечер имате нешто да доработите, избегнувајте да ја користите спалната соба за тоа.

Кога работите во спалната соба, потсвесно ќе почнете да ја поврзувате со тоа. Па, кога ќе дојде време за спиење, може да ви биде тешко да заспиете.

Спирова С. | Црнобело