„Имав спуштена матка по породување, не побарав помош од срам“ - Зошто е важно да знаете за оваа состојба?

Гениталниот пролапс вклучува изместување, односно спуштање на карличните органи кон вагината. Во овие органи спаѓа и матката, па затоа состојбата често е нарекувана „спуштање на матка“.

Веќе спомнавме дека пролапсот не го загрозува животот, но предизвикува болни и непријатни симптоми за жената.

Карлични органи кај жена

Зошто се јавува гениталниот пролапс и кои се симптомите?

Пролапсот настанува кога групата мускули кои ги „држат“ карличните органи ослабуваат.

Постојат неколку фактори кои влијаат врз ова:

• Бременост или породување – особено кога станува збор за тешко породување или раѓање повеќе од едно дете.
• Возраст и менопауза – со годините се намалува нивото на естроген во организмот, а ова има влијание врз ткивата, вклучувајќи ги и оние во карлицата
• Многу прекумерна тежина
• Констипација што трае многу долго или здравствен проблем поради кој се кашла често
• Постојано кревање многу тешки предмети

Симптоми на генитален пролапс:

• Чувство на притисок околу гениталиите и долниот дел од стомакот
• Непријатно чувство во внатрешноста на вагината
• Чувство како нешто да „паѓа“ низ вагината
• Непријатност и болка за време на секс
• Мала испакнатина во областа на вагината
• Проблеми со уринирање, како нецелосно празнење на мочниот меур, зачестена потреба за уринирање или испуштање мало количество урина при кивање, кашлање и вежбање

Во некои ситуации, пролапсот може и да не предизвика симптоми.

Кога да одите на гинеколог?

Ако забележите и само еден симптом или каква било неудобност во областа на гениталиите, препорачливо е да одите на гинеколог.

Гинекологот ќе ви постави прашања во врска со симптомите што ги чувствувате и ќе ви направи преглед.

Можно е да бидат направени други тестови, како за урина, во случај да имате и некоја инфекција.

Како се третира гениталниот пролапс?

Доколу симптомите се благи и не предизвикуваат проблеми, најверојатно нема да ви треба никаков третман.

Сепак, веројатно ќе добиете препораки за промени во секојдневието, вклучувајќи:

• Слабеење ако имате многу прекумерна тежина
• Да избегнувате да кревате тешки работи
• Превенција и третирање на констипација

Доколку симптомите се посилни, постојат неколку опции, вклучувајќи:

• Карлични вежби
• Хормонална терапија
• Операција

Ако сте повозрасни, важно е да знаете дека гениталниот пролапс не е нормален дел од стареењето и менопаузата и треба да побарате помош.

Без разлика на вашата возраст, ако чувствувате каков било симптом, немојте да се срамите да разговарате со вашиот гинеколог.

Спирова С. | Црнобело