Предмети во домот кои сите забораваме да ги исчистиме

Колку често ги перете перниците? А, дали ја чистите машината за садови?

Веруваме дека добро се грижите за хигиената во домот, но сигурно има некои ситници кои заборавате да ги исчистите и, како повеќето, ги занемарувате.

Предмети во домот кои скоро сите забораваме да ги исчистиме:

Перници

Постелнината треба да се менува еднаш неделно, но колку често ги перете перниците?

Иако се заштитени со навлака, на перниците сепак, со текот на времето, се акумулираат бактерии и нечистотии.

Затоа, препорачливо е да ги перете двапати годишно. Ако живеете на потопло место или ако често се потите навечер, добро би било да ги перете и на секои три месеци.

Подот под мебелот

Ако имате висок мебел, веројатно редовно чистите под него.

Но, ако мебелот речиси допира до подот, поверојатно е дека заборавате да го исчистите овој дел.

Не заборавајте дека и под мебелот се собира многу прашина, па не треба да го занемарувате овој простор.

Ако имате низок мебел, препорачливо е еднаш месечно да го потргнете и темелно да исчистите под него.

Просторот помеѓу шпоретот и кујнските елементи

Ако имате малку простор помеѓу шпоретот и кујнската маса, верувајте дека овде се собираат навистина многу бактерии, најмногу бидејќи ова е простор каде што готвиме.

За да го исчистите овој мал простор, можете да завиткате нож со крпа на која ќе нанесете средство за чистење.

Ако има многу масти, можете да искористите и бел оцет.

А, за да го избегнете чистењето, препорачливо е да викнете мајстор кој ќе го исполни просторот помеѓу шпоретот и кујнските елементи.

Организер за прибор за јадење

Иако во организерот ставаме чист прибор за јадење, со текот на времето се валка и тој.

Препорачливо е еднаш месечно темелно да го исчистите.

Горниот дел од внатрешноста на микробрановата печка

Бидејќи обично не го ни гледаме, нормално е да заборавиме да го исчистиме горниот дел од микробрановата печка.

Но, храната која прска остава дамки и на овој дел.

Па, следниот пат кога ќе ја чистите, не го заборавајте и овој дел.

Далечински управувачи

На далечинските управувачи се собираат многу бактерии бидејќи ги допираме и со валкани раце.

Затоа, барем еднаш неделно, па и почесто, добро пребришете ги со антибактериски марамчиња.

Машина за садови

Да, треба да ја чистите и машината за садови.

Ако ја користите многу често, чистете ја еднаш месечно. Ако ја користите поретко, доволно е и еднаш на двата месеца.

Некои машини имаат опција за самостојно чистење која може да ви заврши работа.

Корпа за отпадоци

Сите ја чистиме корпата за отпадоци ако ни претече кесата, но треба да го правиме ова дури и кога нема такви незгоди.

Сепак, во корпата се собираат многу бактерии и важно е да ја дезинфицираме.

Доволно е темелно да ја исчистите корпата на секои две недели.

Спирова С. | Црнобело