Како да ги „светнете“ белите патики за да ги износите и оваа пролет?

Белите патики изгледаат најубаво кога се нови и тоа е факт. Но, по неколку недели многу лесно може да го изгубат белиот сјај, а веќе по неколку месеци изгледаат износено и старо.

Зависно од материјалот, дали се кожени или платнени, треба да го одредите правилниот начин како повторно да ги „светнете“ како нови, без да ги оштетите.

Советите и триковите во продолжение ќе ви помогнат да ги подготвите белите патики за пролетни комбинации:

Измешајте ¼ детергент за миење садови со 2 шолји топла вода. Со чисто сунѓерче истријте го платното, а со стара четка за заби истријте ја гумата. Пребришете со влажна, па со сува крпа и оставете да се исушат.

За полесно сушење, може да ги наполните со хартија која ќе ја впие влагата. Влошките и врвките сушете ги одделно.

Исто така, може да направите мешавина од 1/5 избелувач и 4/5 млака вода и со чиста четка за заби да ги истриете целите патики за да ги избелите. Потоа исплакнете со вода и сушете на место каде нема влага.

За да ја исчистите гумата на ѓонот на белите патики може да користите и бела паста за заби, која ќе ја втриете со четкичка. Потоа само пребришете со влажна крпа.

За белите старки може да користите мешавина од 1 лажичка сода бикарбона и малку оцет. Добиената паста нанесете ја на патиките со нежна четкичка и кратко триење. Оставете да отстои неколку минути, а потоа исперете ги старките во машина за облека.

Сушењето на патиките ќе биде полесно и побрзо доколку ги закачите за јазикот.

Гумениот дел кај прстите може да го исчистите со парче лимон, па потоа да пребришете со влажна крпа.

Кожените бели патики се чистат исклучиво откако ќе ги извадите врвките од нив.

Надворешноста пребришете ја со мокра крпа натопена во млака вода за да ја отстраните прашината. Валканите делови исчистете ги со нежно нанесување на бела паста за заби која ќе отстои неколку минути. Потоа со мека четка и кружни движења, чистете ја површината.

Кога ќе завршите, пребришете со мокра, па сува крпа.

За да додадете сјај на кожата измешајте половина шолја маслиново масло со малку оцет во шише со распрскувач. Нанесете слој од мешавината, почекајте 10-тина минути, а потоа повторно пребришете.

Доколку на патиките има гребаници, може да ги покриете со бел лак за нокти.

Неколку видеа кои може да ви помогнат во процесот на чистење:

И финалниот резултат ќе биде фантастичен!

М. Д. | Црнобело