Предмети што ги користиме „до последно“, но треба почесто да ги менуваме со нови

Сигурни сме дека редовно ги перете крпите за бришење, но сепак е препорачливо да ги замените со нови по седум-осум месеци, особено ако за секое чистење користите едни исти.

Кога купуваме некој предмет за домот, сакаме да ни служи што е можно подолго, особено ако сме дале повеќе пари за него.

Но во некои ситуации не треба да ги користиме работите „до последно“ и добро би било да ги замениме пред да станат потполно бескорисни.

Неколку вакви работи во продолжение:

Филтри за вода

Филтрите за вода можат да бидат совршено место за развој на бактерии, па препорачливо е да ги менувате на секои шест месеци.

Крпи за чистење

Сигурни сме дека добро ги перете крпите за чистење, но и покрај ова не е препорачливо да ги користите многу долго.

Менувајте ги крпите за чистење на секои 7-8 месеци. Притоа, внимавајте да не ги оставате влажни за да не се создаде мувла и перете ги по секоја употреба.

Черга за пред врата

Чергата што стои пред влезната врата нема да биде од голема корист ако е многу стара и многу валкана.

Покрај тоа што треба редовно да ја чистите, препорачливо е да ја менувате барем на секои две години поради нечистотиите и бактериите што се акумулираат на неа.

Навлаки за перници

Една навлака за перница не би требало да ја користите подолго од две години.

Истовремено, важно е да ги менувате навлаките (заедно со постелнината) најмалку еднаш неделно, но и да избегнувате да си легнувате со влажна коса бидејќи навлаката ќе се претвори во совршено место за развој на бактерии.

Одзатнувач за тоалетна школка

За разлика од повеќето предмети на листата, одзатнувачите можат да ви служат со години.

Но, штом ќе забележите дека одзатнувачот не создава вакуум, треба да го промените бидејќи нема да ви биде од голема корист.

Детско седиште за автомобил

Малите деца и бебињата се експерти за создавање неред, па со текот на времето на овие седишта можат да се акумулираат секакви нечистотии. Поради ова, треба да ги чистите редовно.

Истовремено, не треба едно исто седиште да биде во употреба повеќе од 5-6 години. Покрај акумулацијата на нечистотии, по овој период седиштето е истрошено и може да не ја нуди истата безбедност како ново.

Микробранова печка

Квалитетната микробранова печка би можела да ви служи и до десет години.

Но, за да избегнете незгоди, ако забележите какви било промени во нејзиното работење, како некои чудни звуци, најдобро консултирајте се со мајстор и не чекајте целосно да престане да работи пред да ја замените со нова.

Завеса за када

Завесите во бањата морате да ги чистите темелно најмалку еднаш во месецот, а да ги менувате секоја година.

Поради постојаната изложеност на влага, на нив може да има многу бактерии и мувла, па затоа и треба да се менуваат почесто.

Спирова С. | Црнобело