6 работи во станот во Скопје за кои се каам за изборот откако родив дете

Грешка бр. 1 при изборот на стан - до влезот се стига по скали, а нема пристапна рампа за количка. Работи на кои не размислував при изборот на стан, а сега со бебе, по малку ми пречат во секојдневното функционирање. 

За станот во Скопје имавме неколку ситни замерки при изборот, но генерално бевме задоволни од она што го добивме, но и од изборот за уредувањето што го направивме.

Иако уште тогаш имав на ум некои работи земајќи предвид што е попаметно за кога еден ден ќе имаме дете, сепак неискуството си го прави своето.

Па, откако добивме дете, како што поминува времето, така излегува по некоја нова маана, како од самиот стан и зграда, така и од уредувањето.

Секако, не е ништо трагично и за повеќето работи има решение, но доколку сте во процес на бирање или уредување стан, а планирате да го ширите семејството, имајте ги предвид некои од овие работи при изборот.

Работи во станот и зградата каде што живеам, кои не се „бебе-френдли“:

До влезот се стига по скали, но нема пристапна рампа за количка, па морам да ја расклопувам секојпат кога сум сама

Нема пристап до гаражата од влезот, па мора да се „товариме“ со сите реквизити пред зграда

фото: depositphotos.com

Од влезната врата струи ладен воздух кон станот низ клучалката и кај подот, па не е секогаш пријатно детето да биде на земја

Лифтот е мал и едвај ја собира количката во дијагонала, па ако имам и ќеси и торби, невозможно е да собере сè одеднаш (за среќа, барем ја собира количката)

Во кујната има само два штекера, па по цел ден менуваме кабли од сите можни уреди - стерилизатор, блендер, електрично ѓезве, кафемат и слично

Бонус - грешка во уредување: Во дневната имаме тешки гранитни маси со метални, остри ногарки, па мора да ги обмотаме цели со гума и да внимаваме да не се превртат со некоја бебе-акробација

М. М. | Црнобело