5 грешки во уредувањето на кујната за кои сигурно ќе се каете

Долги завеси кои впиваат мирис или елементи со релјеф кои ќе биде речиси невозможно да ги исчистите - кои се грешките за коишто луѓето најмногу се каат?

Од целиот дом, можеби најголем предизвик за уредување е кујната, особено ако имате мал простор.

Треба да ја направите практична, а сепак да изгледа како што сте замислиле.

Ако планирате да реновирате или го уредувате новиот дом, внимавајте на следните грешки за кои сигурно ќе се каете:

Премногу отворени полици

Иако отворените полици моментално се хит, немојте целосно да ги заменувате шкафчињата со нив.

Ако ви е мерак, оставете една две полици, но имајте и шкафчиња.

Причината е тоа што полиците не се најпрактични – ќе треба секогаш да бидат уредни, а и работите што ги чувате на нив нема да бидат заштитени од прашина, па ќе треба да чистите многу почесто.

Погрешни завеси

Долгите завеси воопшто не се практични за во кујна, особено ако е мала.

Покрај тоа што лесно ќе се валкаат, ако имате мала кујна, долгите зависи ќе го направат просторот визуелно уште помал. Завесите од ткаенина и ќе ги впиваат сите мириси од кујната, па ќе треба да ги перете многу често.

За прозорците во кујна секогаш е подобро да ставите венецијанер ролетни или нешто слично.

Само еден извор на светлина

Важно е во кујната да имате добро осветлување и обично само едното светло на таванот не е доволно.

Шкафчињата, аспираторот и полиците создаваат сенка над работната маса, а ова ќе ви ја отежни работата во кујна.

Затоа, ставете повеќе извори на светлина, вклучително и над самата работна маса.

Многу шарени елементи во мала кујна

Кујните со многу бои можат да изгледаат навистина стилски.

Но, во мала кујна, многуте бои и дезени можат да го задушат просторот и да направат да изгледа хаотично.

Ако имате мала кујна, но не сакате само неутрални бои, тогаш можете да направите еден елемент во впечатлива боја или дезен.

Елементи со релјеф

Кујната е место што се валка лесно, па важно е елементите да бидат лесни за чистење.

Затоа, во овој дел од домот избегнувајте шкафчиња и други елементи кои имаат релјеф, туку дајте им предност на оние со рамни површини.

Спирова С. | Црнобело