Совети како природната елка оваа година да ви потрае подолго

Доколку и вие секоја година бирате природна новогодишна елка, свесни сте дека за нејзиниот избор и одржување ви се потребни неколку часа.

За оваа година да си ги скратите маките, а да го продолжите нејзиниот рок на траење, следете ги овие совети:

Колку е потешка елката, толку подолго трае

Пред да ја купите елката задолжително проверете колку тежи, советуваат продавачите. Потешките дрвца обично задржуваат повеќе вода, а самото тоа значи дека дрвото е поздраво и дека ќе трае подолго.

Смреката има поубав мирис, но елката е поиздржлива

Нордиската елка е совршена за во домот, затоа што игличките и се помазни и тешко паѓаат. Исто така гранките се посилни, што е одлично за сите украси кои сакате да ги наредите.

Вистина е дека смреката поубаво мириса, но не е толку издржлива на топлина колку елките, па ако веќе се одлучите за смрека, чувајте во просторија со умерена температура.

Новогодишното дрво треба да е подалеку од изворот на топлина

Ако живеете во стан најдобро е да го чувате дијагонално, односно најдалеку од радијаторите, но и од директната сончева светлина. Топлината го суши дрвото, а директната светлина предизвикува паѓање на игличките.

Вода и земја

Исечената елка во просек трае 4 до 6 недели. За да трае што подолбо, треба да го потсечете стеблото за сантиметар ипол и да го потопите во сад со вода. Покрај тоа редовно ставајте и вода и пропрскувајте и ги гранките за да ја освежите.