Maкедонски нутриционист одговара за CRNOBELO: „Дали е поздраво овошје или смути и цедени сокови?“

Ако треба да се избира меѓу смути и сок, смутито е подобра опција од сокот бидејќи во него влегува целиот плод, вклучувајќи ја и пулпата (каде што се влакната).

Фактички добиваме сè што нуди овошјето, но во течна форма.

Недостаток е што блендирањето физички ги „кине“ влакната, па телото нешто побрзо го обработува шеќерот отколку кај целото овошје.

Исто така, често со смутито внесуваме многу повеќе калории отколку што сме свесни, а добиваме помало чувство на ситост.

Инаку во однос на хранливи материи, генерално нема разлика меѓу целото и блендираното овошје.

Цедениот сок не е лоша варијанта, само што при цедењето се фрлаат влакната (пулпата) и се задржуваат само шеќерот и витамините.

Без влакната, овошниот шеќер брзо се апсорбира, предизвикувајќи нагло качување на инсулинот. Ова може да доведе до брз пад на енергијата и чувство на глад набрзо потоа.

Сокот е одличен како брза витаминска бомба, но никако не треба да биде замена за оброк или вода.

Најчестото прашање е: „Може ли да го исцедам сокот сега, а да го пијам подоцна?“

Најдобро е свежо цедениот сок да се испие во рок од 15 до 20 минути.

Штом овошјето ќе се излупи или ќе се исцеди, започнува процесот на оксидација (реакција со кислородот од воздухот).

Најчувствителен е витаминот Ц, кој почнува да се разградува веднаш штом е изложен на воздух и светлина. Колку подолго стои сокот, толку помалку витамин Ц останува во него.

Свежите ензими кои помагаат во варењето исто така брзо ја губат својата активност.

Ако навистина не можете да го испиете веднаш, цедениот сок чувајте го во стаклен сад, убаво затворен.

Чувањето на ладно е задолжително, но и во тој случај, сокот мора да се испие најмногу за 24 часови, иако вкусот и хранливоста веќе по 2-3 часа нема да бидат исти“.

Прочитајте и Maкедонски нутриционист одговара за CRNOBELO: „Дали месото (не) треба да се мие пред готвење?“

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело / фото: depositphotos.com

С. С. | Црнобело